Daýyl saldarynan Medeý shatqalynda 5 myńnan astam aǵash qulady
ALMATY. 18 mamyr. QazAqparat/Erbol Azanbek/ - Keshe keshki saǵat 19.30 shamasynda Almatyda soqqan qatty daýyldan Medeý shatqalynda 5 myńnan astam aǵash qulap qaldy.
Búgin almatylyq BAQ ókilderi oqıǵa ornynda bolyp, dúleı daýyldyń saldaryn óz kózderimen kórip qaıtty.
«Jalpy shyǵyn mólsheri anyqtalýda. Medeý shatqalynda qulaǵan, synǵan aǵashtardyń jalpy sany 5 myńnan astam. Ókinishke qaraı, bul jerde adam ólimi oryn aldy. Tótenshe jaǵdaılar departamentiniń dereginshe, Taraz qalasynyń turǵyny qaza tapqan. Almaty qalasynan Shymbulaqqa deıin bara jolda 500 aǵash qulǵan. Al Almaty qalasynyń ózinde 74 aǵash qulady. Olardan asa iri zııan kelgen joq. Qazirgi kezde tazalaý jumystary júrgizilýde. Almaty qalasynda tazalaý tolyq aıaqtaldy, al Medeý shatqalyn tazalaý jumystary osynda ornalasqan Іle-Alataý tabıǵı parki men Medeý ulttyq saıabaǵymen birlese otyryp júzege asyrylýda», - dedi Almaty qalalyq tabıǵatty paıdalaný jáne retteý basqarmasynyń bastyǵy Altaı Rahymbaev.
Almaty qalalyq Gıdrometqyzmettiń bastyǵy Qonysbek Baedilovtiń sózine qaraǵanda, keshegi kúni kóshpeli bultty, jeldiń qýaty 3,8 m/sekýnd deńgeıinde soǵyp, 13 mm-lik qysqa merizimdi jaýyn jaýady, jalpy aýa raıy +24, +26 gradýs jyly bolady dep boljanǵan bolatyn. «Bul boljam qala aýmaǵynda týra keldi. Ókinishke qaraı, Shymbulaqta 30 mm kóleminde burshaq túsip, qýattylyǵy 11-14 m/sek. boran soqty. Sonyń saldarynan tabıǵatqa zııan kelip otyr. Buny tosyn qubylys dep sanaýǵa bolady. Almatynyń tarıhynda tuńǵysh ret oryn alyp otyr», - deıdi Q.Baedilov. Onyń aıtýynsha, aldaǵy kúnderi bundaı qýatty boran, jaýyn bolmaıdy. «20 mamyrǵa deıingi boljam boıynsha kóshpeli bult, jaýyn baıqalady. Keı kúnderi qýaty 10 m/sek. deıin jetetin jel soǵýy múmkin. Jalpy asa qatty boran, jaýyn-shashyn boljanyp otyrǵan joq», - dedi ol.
QR TJM habarlaýynsha, keshegi boran, jaýyn saldarynan Almatyda qulaǵan aǵashtan bólek 22 úıdi sý basqan, 31 jerde elektr jelileri úzilgen. Almaty-Medeý avtojolynyń aýdanynda ekologııalyq post pen «Beladjıno» meıramhanasynyń arasynda jazǵy demalys shatyryna aǵash qulap, onda 1987 jyly týylǵan er adam qaza taýyp, 1989 jyly týylǵan onyń qurbysy 12-qalalyq aýrýhana jetkizilgen. Almaty qalasynyń ákimi Ahmetjan Esimovtyń aıtýynsha, qazirgi kezde jaǵdaı qalpyna keltirilýde. «Qala aýmaǵyndaǵy úzilgen elektr jelisi men qulaǵan qorshaýlar tolyq búgin, erteń jasalady. Al Іle Alataýy men Medeý ulttyq parkterine qarasty aýmaqtarda biraz jumystar kútip tur», - dedi A.Esimov.
