Daýyl, kóktaıǵaq, burqasyn: Qazaqstannyń on úsh aımaǵynda daýyldy eskertý jarııalandy
ASTANA. QazAqparat - Búgin Jambyl oblysynyń taýly aýdandaryna tuman túsedi. Soltústik-shyǵystan jel soǵady, dep habarlaıdy QazAqparat Qazgıdrometke silteme jasap.
Tańerteń jáne kúndiz Almaty oblysynyń taýly, taý etegindegi aýdandarynda tuman, soltústiginde jáne shyǵysynda 15-20 m/s soltústik-batys jeli kútiledi.
Qyzylorda oblysynda shyǵystan jel soǵady, kúndiz oblys ortalyǵynda ekpini 15-20 m/s bolady.
Sınoptıkter osy kúni Aqmola oblysynyń batysynda, soltústiginde, shyǵysynda tuman túsip, kóktaıǵaq bolady dep boljady.
Túnde Mańǵystaý oblysynyń batysynda, kúndiz ortalyǵynda qatty jańbyr jaýýy múmkin. Shyǵystan, soltústik-shyǵystan jel soǵady.
«28 qazanda Atyraý oblysynyń batysynda, ońtústiginde ońtústik-shyǵystan jel soǵady, ekpini - 15-20 m/s.
Batys Qazaqstan oblysynda jel ońtústik-shyǵystan soǵady, kúndiz soltústik-batysynda, ońtústiginde ekpini 15-20 m/s bolady.
Al Astana qalasynda túnde tuman, kóktaıǵaq kútiledi», - dep jazdy vedomstvodan.
Búgin túnde jáne tańerteń Túrkistan oblysynyń ońtústiginde jáne taýly aýdandarynda tuman túsedi. Shyǵystan jel soǵady, kúndiz taýly aýdandarda kúshi 15-20 m/s deıin barady.
Túnde Abaı oblysynyń soltústiginde, batysynda, ortalyǵynda tuman, kóktaıǵaq, jaıaý burqasyn kútiledi. Ońtústik-batystan soǵatyn jel soltústik-batysqa aýysady, túnde oblystyń soltústiginde, batysynda, ortalyǵynda ekpini - 15-20 m/s.
28 qazanda túnde Shyǵys Qazaqstan oblysynyń soltústik-shyǵysynda qatty jaýyn-shashyn (kóbinese qar) bolady. Oblystyń soltústiginde, shyǵysynda tuman, kóktaıǵaq, jaıaý burqasyn kútiledi.
Túnde jáne tańerteń Soltústik Qazaqstan oblysynyń ońtústiginde tuman túsedi. Batystan, ońtústik-batystan jel soǵady, túnde oblystyń shyǵysynda, kúndiz oblystyń soltústiginde, batysynda, shyǵysynda ekpini 15-20 m/s deıin barady.
Pavlodar oblysynda da kóktaıǵaq, jaıaý burqasyn saqtalady. Batystan jel soǵady.
