Dáýren Qýat: Demokratııa qundylyqtary kúndelikti ómirimizge enip, qoǵamnyń izgilenýi jedeldeı túspek
«Bálkim, ýaqyttyń tegeýrinine shydaý múmkúin bolmaǵan shyǵar, bálkim, saıası júıeniń talaby men saıası júristerinen aldanyp qalmaýdyń qıyndyǵynan qıyndyq kórgen shyǵar, kóp jigitter ózderi qoǵamdasyp qurǵan bılikten qashty, qashtyńyz ne, qarsy shyqty. Sol kezde myzǵymaǵan bir adamdy bilemin, ol – Qaskeń – Qasym-Jomart Toqaev. Qasym-Jomart Toqaev degen kisińizdi men ultyn, qazaǵyn súıetin, súıýdiń sumdyǵy men shyndyǵyna shydap, tóze biletin tulǵa dep bilemin. Qısatpaı, qıratpaı qazaǵyn myna qym-qýat zamannan alyp shyǵý oǵan amanat», - deıdi Dáýren Qýat.
Odan ári avtor Qazaqstanda saıası júıeni jańǵyrtýǵa naqtyly qadamdar jasalyp jatqanyn atap ótti.
«Al endi, resmı málimet: Men Prezıdent Qasym-Jomart Toqaevtyń halyqqa arnaǵan Úndeýin qanaǵattanarlyq sezimmen oqyp shyqtym. Qazaqstan búginderi álemdik demokratııalyq úrdisterge ún qatyp, memleketimizdegi saıası júıeni jańǵyrtýǵa naqtyly qadamdar jasap kele jatqanyn kórip otyrmyz. Osy oraıda jańa ustanymdarǵa baılanysty parlamenttik oppozıtsııa ınstıtýtyn qalyptastyryp, zań shyǵarýshy organnyń bir kommısııasyna tóraǵalyq etýdi, sonymen birge eki hatshynyń oppozıtsııalyq depýtattar arasynan saılanýy buryn-sońdy bolmaǵan úrdis ekenin aıtqym keledi. Bul kózqarastar men pikirlerdiń sanalýandyǵy men qabyldanatyn sheshimderdiń jan-jaqtylyǵyn qamtamasyz etedi dep senemin», - dedi ol.
Sondaı-aq, Dáýren Qýat áıelder qaýymy men jastardyń jergilikti organdarǵa kóptep kelýin qoldaıtynyn aıtty: «Jańa tujyrymdamada, sonymen birge, áıelder men jastar úshin 30 paıyzdyq kvota berilýin naqtylaı túsedi. Buryn bul másele aýyzsha ǵana sóz bolyp kelse, endi oryndalýy tıis qujat bolatyny túsinikti. Demek, Prezıdentimiz aıtqandaı, buryndary shetqaqpaı kórip kelgen áıelder qaýymy men jastar Parlamette ǵana emes, jergilikti organdarǵa da keńinen tartyla bastamaq».
Sóz sońynda Ulttyq qoǵamdyq senim keńesiniń múshesi qazaqstandyq qoǵamnyń izgilenýi jedeldeı túsetinine senim bildirdi.
«Úndeýde aıtylǵan máslıhattar saılaýynyń partııalyq tizim boıynsha ótýi kópten beri qoǵamda talqylanyp kele jatqan dúnıe. Odan keıin jergilikti ákimderdiń saılanyp qoıylýy óz sheshimin tabady dep senemin. Osylaısha demokratııa qundylyqtary kúndelikti ómirimizge enip, qazaqstandyq qoǵamnyń izgilenýi jedeldeı túspek» dep túıdi sózin ol.
