Dáýren Erǵalıevtiń dara joly: munaı esebindegi dáldik

ASTANA. KAZINFORM — Munaı-gaz salasy — el ekonomıkasynyń strategııalyq tirekteriniń biri. Bul salada bir ǵana sannyń, bir ǵana eseptiń artynda mıllıondaǵan qarjy men óndiristik protsesterdiń turaqtylyǵy tur. Sondyqtan munaı esepteý isi asa joǵary jaýapkershilik pen kásibı dáldikti talap etedi. Osyndaı mańyzdy baǵytta uzaq jyl boıy tabandy eńbek etip kele jatqan mamandardyń biri — «Qazaqstan-Qytaı Qubyry» JShS «Keńqııaq» nysanyndaǵy munaı esepteý ınjeneri Dáýren Erǵalıev. 

Dáýren Isataıuly 1989 jyly Aqtóbe oblysy, Temir aýdanyna qarasty Keńqııaq eldi mekeninde dúnıege kelgen. Osy óńirde ósip-jetilgen ol bala kezinen sportqa, ásirese fýtbolǵa erekshe qyzyǵýshylyq tanytty. Sportpen aınalysý onyń boıynda tártipke baǵyný, tózimdilik, jaýapkershilik jáne komandamen jumys isteý daǵdylaryn qalyptastyrdy. Keıin bul qasıetter kásibı qyzmetinde mańyzdy ról atqardy.

Bolashaq mamandyǵyn tańdaýda Dáýren Erǵalıev munaı-gaz salasyna sanaly túrde bet burdy. 2004–2008 jyldary Aqtóbe polıtehnıkalyq kolledjinde «Munaı jáne gaz salasy» mamandyǵy boıynsha bilim alyp, alǵashqy tehnıkalyq daıarlyqtan ótti. Al 2008–2011 jyldary Q.Jubanov atyndaǵy Aqtóbe óńirlik ýnıversıtetin támamdap, joǵary bilim aldy. Teorııalyq bilim men praktıkalyq daǵdylardy qatar meńgerýi onyń kásibı turǵyda qalyptasýyna negiz qalady.

Munaı salasyn tańdaýǵa otbasylyq yqpal da zor boldy. Ákesi de osy salada uzaq jyl eńbek etken. Bala kúninen ákesiniń jumysqa degen adaldyǵyn, tártip pen jaýapkershilikke negizdelgen kásibı ustanymyn kórip ósken ol munaı óndirisin ómirlik baǵyty retinde tańdady. Óziniń aıtýynsha, bul sala tek turaqty jumys qana emes, el damýyna naqty úles qosýdyń joly.

2011 jyldan beri Dáýren Erǵalıev «Qazaqstan-Qytaı Qubyry» JShS quramynda eńbek etip keledi. Alǵashqy kúnnen-aq ol bul jumystyń qanshalyqty kúrdeli ári jaýapty ekenin tereń sezindi. Qatań tártip, qaýipsizdik talaptary men naqty reglamentter jas mamannyń kásibı kózqarasyn qalyptastyrdy. Ár aýysymda munaı kólemin dál esepteý, qabyldap-tapsyrý qujattamasyn júrgizý, ólsheý quraldarynyń durystyǵyn baqylaý — onyń kúndelikti mindetine aınaldy.

— Munaı esepteý isinde usaq aıyrmashylyqtyń ózi úlken qarjylyq jáne óndiristik saldarǵa ákelýi múmkin. Sondyqtan bul qyzmette naqtylyq, uqyptylyq, tehnıkalyq saýattylyq pen tsıfrlarmen jumys isteı bilý — basty talap. Sońǵy jyldary salada tsıfrlandyrý men avtomattandyrý úderisteri kúsheıip, esep-qısaptyń basym bóligi elektrondy formatqa kóshti. Bul tıimdilikti arttyryp, ashyqtyqty qamtamasyz etkenimen, adam faktoryna degen jaýapkershilik áli de birinshi orynda qalyp otyr, — deıdi Dáýren Isataıuly.

Keıipkerimiz jumys barysynda kez kelgen máseleni asyqpaı, bekitilgen standarttar men nusqaýlyqtarǵa súıene otyryp sheshýdi negizgi qaǵıda sanaıdy. Ol óz eńbegin el ekonomıkasyna tikeleı áser etetin naqty nátıje beretin qyzmet retinde baǵalaıdy. Onyń pikirinshe, turaqty jetistikke jetýdiń basty negizi — adal eńbek pen jaýapkershilik.

Kóp jylǵy tabandy eńbegi men sala damýyna qosqan úlesi tıisti deńgeıde baǵalandy. 2016 jyly Qazaqstan Respýblıkasynyń Konstıtýtsııasy kúnine oraı joǵary eńbek jetistikteri men kásibı sheberligi úshin Qurmet gramotasymen marapattaldy. 2021 jyly Qazaqstan Respýblıkasynyń Táýelsizdiginiń 30 jyldyǵyna baılanysty Alǵys hatqa ıe boldy. Al 2025 jyly «QazTransOıl» AQ tarapynan munaı-gaz sektorynyń damýyna qosqan eleýli úlesi, kásibı biliktiligi men adal eńbegi úshin Qurmet gramotasymen marapattaldy.

Dáýren Erǵalıevtiń eńbek joly — óz isine jaýapkershilikpen qaraıtyn, kásibı adaldyqty basty ustanym etken munaı salasy mamanynyń naqty úlgisi.