Dáýren Abaevty tamsandyrǵan jańalyqtar
«Osy aptada qaıǵyly jaǵdaılarmen birge el úshin jaǵymdy jańalyqtar da mol bolǵanyn atap ótkim keledi. Men úshin qýanyshty jańalyq - mánerlep syrǵanaýdan ótken Álem chempıonatynda Elızabet Tursynbaevanyń kúmis júldesi der edim. Bul keremet boldy. Erkin baǵdarlamadaǵy prokatty álemniń búkil BAQ kózderi erekshe atap ótti. Bizdiń Elızabet tórt aınala bıikke sekirip, sporttyń bul túrindegi básekelestikti ǵaryshtyq deńgeıge bir-aq shyǵardy. Bizdiń el úshin bul medal - «altynmen» teń. Budan bylaı qyzdar arasyndaǵy mánerlep syrǵanaýdan bizdiń el óte az memleketterdiń elıtarly klýbyna endi dese de bolady», - Dáýren Abaev.
Mınıstr sonymen birge apta ishindegi ekinshi jaǵymdy jańalyqtyń qandaı bolǵanyn aıtyp berdi.
«Vremıa» gazetinde men baýyrdy aýystyrýǵa qatysty biregeı ota jasalǵanyn oqydym. Donor retinde patsıenttiń eki nemereles aǵasy qoldaý bildirgen. Eki jigit óziniń baýyrynyń 30 paıyzyn bergen. Búkil álemde osy kúnge deıin osyndaı otalar jasaıtyn bes el ǵana bolǵan. Endi ondaı elderdiń sany altyǵa jetti. Donorlar baýyrynyń úshten bir bóligin berýdiń arqasynda búgingi tańda patsıenttiń bári aýrýhanadan shyqty. Bul jaǵdaıda dárigerlerdiń kásibıligi de, aǵaıyndardyń bir-birine kómek qolyn sozýy da erekshe tamsandyrady. Qazaqtar «aǵa aldynda peıilińdi, baýyr aldynda meıirińdi kórset» degen sóz bar. Odan artyq ne deýge bolady!?», - dedi ol.
Eske sala ketsek, Japonııanyń Saıtama qalasynda mánerlep syrǵanaýdan Álem chempıonatynda qazaqstandyq Elızabet Tursynbaeva kúmis júldeger atanǵan bolatyn. Qazaqstandyq sportshy erkin baǵdarlamany tamasha oryndap, qorytyndyda 224,76 ball jınady. Sportshylardyń eń sońynan shyqqan E.Tursynbaeva eresekter arasyndaǵy álem chempıonatynda tuńǵysh ret tórt aınalymdyq salhov elementin oryndady. Muny shyn máninde tarıhı nátıje deýge bolady.
Qazaqstanda tuńǵysh ret eki adamnan bir adamǵa baýyrdyń bólikteri aýystyryp salynǵanyn budan buryn jazǵan bolatynbyz.
