Dáýren Abaev jeke gazetterdi qoldaýdyń jolyn atady

ASTANA. QazAqparat - QR Aqparat jáne kommýnıkatsııalar mınıstri Dáýren Abaev jeke gazetterdi qoldaý tetikteri qarastyrylyp jatqanyn málim etti. Bul týraly mınıstr «Nur Otan» partııasynyń respýblıkalyq qoǵamdyq qabyldaýynda Qyzylorda oblystyq «Syr dıdary» gazetiniń redaktory Sáken Aldashbaevtyń bergen usynysyna bergen jaýabynda aıtty.

«Jeke gazetterdiń jazylym máselesi bar. Qazirgi jeke gazetterdiń tilshileriniń jaǵdaıy nashar. Qazir mekemeler gazetke jazylýdan ábden mezi bolǵan. Osynyń júıesi jasalý kerek sııaqty. Men belgili bir mekemede aılyq alyp, alty aı saıyn 5-6 myń teńgeni bólip otyrsam, al sol mekemedegi basshymyz qaı gazetke jazylǵanymyzdy bilmese... Sebebi, máselen meniń memlekettik mekemede eńbek etetin meniń dosymnyń úıinde álgi dosymnyń ózine, áıeline, ákesine úsh gazet birden kelip turady. Bul memlekettik gazetterge degen halyqtyń basqasha kózqarasyn qalyptastyrady», - degen Sáken Aldashbaev jeke gazetterdiń jaǵdaıy týraly másele kóterdi.

Bul suraqqa bergen jaýabynda Dáýren Abaev gazetterdi kúshtep jazdyrýǵa ózi de qarsy ekenin atap ótti.

«Jazylym jóninde aıtarym. Oǵan men de qarsymyn. Ol másele tek gazettiń sapasy arqyly ǵana sheshilý kerek. Bul bir. Gazettiń ishinde jazylǵan materıaldardyń sapasy jaqsy bolsa, gazetti adamdar ózderi-aq izdeıdi. Bizdiń tarapymyzdan ondaı gazetterge kómektesýdiń bir-aq tásili bar - ol múmkindiginshe mysaly salyq máselesin sheship berý. Salyq máselesin sheshetin bolsaq, onda gazet shyǵarylatyn qaǵazdyń baǵasy da arzandaıdy. Sonyń arqasynda Sizder gazette jýrnalısterge laıyqty túrde aqsha tólep, gazettiń sapasy ósedi. Ony jaqsy túsinýińiz kerek», - dedi Dáýren Abaev.

Mınıstr salyq máselesin sheship berý arqyly jeke gazetterdi qoldaýǵa bolatynyn qaıtalap aıtty.

«Ony qarastyryp jatyrmyz. Jyldyń sońyna deıin osynyń bárin jarııalaýǵa daıyn bolamyz. Mynany túsinýlerińiz kerek: bul meniń ǵana qolymda emes. Zańǵa ózgerister engizý kerek. Bir zańǵa ózgeris engizý úshin 15-17 memlekettik organdardan ótýimiz kerek. Bir memlekettik organnan memleketke qarjy túspeı qala ma degen jaǵyn qarastyrady. Sondyqtan, máseleniń osyndaı qyry kóp. Muny bilmeıdi eken dep oılap qalmańyz. Bárin bilip otyrmyz, bir sheshimin tabamyz degen oıdamyn», - dedi Dáýren Abaev.