Dáýren Abaev Jaıyqtaǵy balyqtardyń qyrylý sebebin atady
ASTANA. QazAqparat - Aqparat jáne qoǵamdyq damý mınıstri Dáýren Abaev Jaıyq ózenindegi balyqtardyń qyrylý sebebin atady, dep habarlaıdy QazAqparat tilshisi.
«Jaıyq ózeninde balyqtyń qyrylýy boıynsha alǵashqy fakt anyqtalǵan kezde - ótken jyldyń jeltoqsan aıynda birden vedomstvoaralyq komıssııa qurylǵan bolatyn. Onyń quramyna barlyq jaýapty memlekettik organdardyń - qalalyq ákimdikten bastap tabıǵat qorǵaý prokýratýrasynyń ókilderi kirdi. Áý basta ártúrli nusqalar aıtylyp jatty. Máselen, qatal qysta muzdyń qalyńdyǵynan otteginiń jetispeı qalýy saldarynan balyqtar tunshyǵyp qaldy degen boljam boldy. Budan bólek, balyqtyń qyrylýyna epıdemııa sebep boldy degen boljam da aıtylyp jatty. Aqyry, komıssııa - buǵan hımııalyq ýlaný sebep boldy degen sheshimge keldi», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstr sonymen birge bul jaǵdaıǵa kim kináli degen suraqqa jaýabyn bere ketti.
«Qazirgi ýaqytta maǵan belgili bolyp otyrǵandaı, ózenge zııandy hımıkattardy shyǵardy degen kúdikke 4 kompanııa iligip otyr. Osy kompanııalardyń bárine tekseris júrgizilip jatyr. Biraq, kimniń naqty aıypty ekenin tergeý kórsetedi. Eń bastysy, tutynýǵa kelmeıtin balyqty dúkenderdiń sóresine túsip ketpeýi baǵytynda barlyq sharalar qolǵa alynyp jatyr. Bul sharýamen tıisti qyzmetter, veterınarııa men sanepıdemstantsııa qyzmetteri aınalysýda. Olar Atyraý qalasynyń dúkenderine kúndelikti reıd júrgizip júr», - deıdi Dáýren Abaev.
Esterińizge sala keteıik, buǵan deıin Atyraý oblysynda balyqtyń qyrylǵany týraly birneshe aqparat jarııalaǵan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi.
Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan.
Aıta keteıik, Atyraýda Jaıyq ózenin balyq ólekselerinen tazartý sharalary qolǵa alyndy.
