Dáýren Abaev jastardy teatr men kitaphanalarǵa kóptep tartýdyń bir jolyn aıtty
ALMATY. QazAqparat - QR Mádenıet jáne sport mınıstri Almaty qalasyna jumys sapary aıasynda Ulttyq kitaphana, Abaı atyndaǵy Qazaq Ulttyq opera jáne balet teatryna, Qurmanǵazy atyndaǵy Qazaq Ulttyq halyq aspaptar orkestrine, Ǵ. Músirepov atyndaǵy Qazaq Memlekettik akademııalyq balalar men jasóspirimder teatryna bardy, dep habarlaıdy QazAqparat tilshisi.
Atalǵan uıymdardyń ujymymen kezdesý barysynda Dáýren Abaev mádenıet oshaqtaryn qur tanysý úshin aralap júrmegenin aıtty.
«Áýeli biz uıymdardyń túıindi máseleleri men qyzmetkerlerdiń suranystaryn zertteımiz. Máselelerdiń barlyǵy júıelendirip, keıinnen olardy kezeń-kezeńmen sheshý jónindegi keshendi jospardyń negizine alynady. Biz barlyq mańyzdy sharalardy Memleket basshysymen kelisip, sodan keıin olardy iske asyrýǵa kirisemiz. Bul turǵyda sizder túsinistikpen qarap, shydamdylyq tanytyp, qoldaıtyndaryńyzǵa kúmánim joq. Osynyń arqasynda kórermenderimiz ben oqyrmandarymyzdy, onyń ishinde ásirese jastardy, teatrlardyń kórermender zalyna jáne kitaphanalardyń oqý bólmelerine qaıtaratynymyzǵa senim artamyn», - dep atap ótti mınıstr.
