Dáýren Abaev jalǵan aqparatpen kúresýdiń jolyn atady

NUR-SULTAN. QazAqparat – Aqparat jáne qoǵamdyq damý mınıstrligi Bilim jáne ǵylym mınıstrligine mektep qabyrǵasynan bastap medıalyq saýattylyqty arttyrý boıynsha pılottyq joba usynbaq.

Bul týraly «Ashyq dıalog» baǵdarlamasynda Aqparat jáne qoǵamdyq damý mınıstri Dáýren Abaev málim etti, dep habarlaıdy QazAqparat tilshisi.

«Álbette mundaı oqıǵa kezindegi basty qural – resmı túsindirme berý. Aqparatty barynsha shuǵyl berý kerek. Biraq mundaıda kelesi problemamen betpe-bet kelemiz: WhatsApp-pen arandatýshy daýyspen taraıtyn habarlama búkil chattarǵa 20 mınýttyń ishinde tarap ketýi múmkin. Al bul habarlamany rastaý nemese joqqa shyǵarý úshin odan uzaq ýaqyt kerek. Atap aıtqanda, ol úshin oqıǵa ornyna shyǵyp, aqparattyń shyn-ótirigin tekserip, sebepterin anyqtaý kerek. Álbette, bul ýaqytta qajet etedi», - dedi Dáýren Abaev «Ashyq dıalog» baǵdarlamasynda.

Mınıstrdiń aıtýynsha, bul úrdis Qazaqstannyń ǵana emes, álemniń problemasyna aınalǵan.

«Onyń tyń mysalyn koronavırýsqa qatysty jalǵan aqparattan-aq kórýge bolady. Dúnıejúzilik densaýlyq saqtaý uıymy jalǵan aqparattarǵa qarsy turý úshin «Google» kompanııasyna júginýine týra keldi. Sol sebepti mundaı provokatsııalyq jaılarmen kúresýdiń eń tıimdi ári uzaq merzimdi mehanızmi – aqparatty tutyný mádenıeti. Biz sol úshin árdaıym aqparattyq gıgıena máselesin jıi kóteremiz. Týysy nemese kórshisi bir jibergen aqparatqa senip qalmaı, oqıǵanyń resmı túsindirmesin kútken adam ǵana aqparattyq gıgıenany saqtaı alady», - deıdi ol.

Dáýren Abaev sol sebepti senimdi aqparat kózderinen jańalyqty baqylap otyrý kerektigin jetkizdi.

«Bizdiń mınıstrlik mektep qabyrǵasynan bastap medıa saýattylyqty arttyrý boıynsha óz usynysyn beredi. Biz ilki joba retinde buny Bilim jáne ǵylym mınıstrligine usynǵymyz keledi», - dedi Dáýren Abaev.