Dáýren Abaev vaktsınatsııa máselesindegi adam quqyǵyna qatysty aıtty
«Bul jerde jalǵyz jol bar. Memleket ekpe alǵan azamattar úshin áleýmettik basymdyqtardyń tizimin birtindep, asyra silteýsiz keńeıte beredi. Qoǵamdyq oryndarǵa barý, saparǵa shyǵý múmkindikteri ekpe alǵandarda kóbirek bolady. Adam quqyqtaryn buzý máselesine kelsek, qazir bul bizdiń elde ǵana emes, búkil álemde ózekti bolyp tur. Batys baspasózin oqysańyz, ol jaqta ekpe almaǵan adamdardy jumystan qýyp jatyr. Biraq eshkim konstıtýtsııalyq quqyǵy shektelgenin aıtyp, shaǵymdanyp jatqan joq. Kerisinshe, vaktsınatsııa adamnyń qaýipsizdigimen baılanysty bazalyq quqyǵyn qorǵaıdy», - dedi Dáýren Abaev.
Prezıdent Ákimshiligi Basshysynyń orynbasary skeptıkterdiń vaktsınatsııaǵa qarsy keltirip júrgen argýmentterin mıfke teńedi.
«Men olardy argýment degenshe – mıf der edim. Saýalnamalarǵa súıensek, bizde vaktsınalaýǵa qatysty skeptıtsızm Afrıka elderine qaraǵanda jaqsyraq. Mysaly, kóp adamdar dinı paıymyna baılanysty vaktsına alǵysy kelmeıdi. Biraq bizdiń eldegi barlyq konfessııalardyń basshylary vaktsına men dinı qaǵıdalar arasynda qaıshylyq joq ekenin rastady. Álemdegi eń bir dinı memleket – Saýd Arabııasy. Sol eldiń ózinde qajylyqqa barý úshin vaktsına pasportyn suraıdy», - dedi Dáýren Abaev.
Sondaı-aq, ol áleýmettik jelide vaktsına alsa da, vırýs juqtyrǵan adamdar týraly taraǵan aqparattarǵa túsinik berdi.
«Iá, shynymen ondaı jaıttar bar. Birinshiden, ondaı adamdar syrqatty áldeqaıda jeńil ótkerip jatyr. Ekinshiden, vaktsınatsııa kórsetkishi joǵary elderdiń satıstıkasy vırýs juqtyrǵan 1000 adamnyń beseýi ǵana vaktsına salǵyzyp úlergenin kórsetip otyr. Áleýmettik jelidegi qorqynyshty aqparattardyń kóbi – feık. Jýrnalıster sonyń bárin joqqa shyǵaryp úlgermeı jatyr. Bir feıktiń betin ashsa, ornyna taǵy úsheýi paıda bola ketedi. Sondyqtan vaktsınalaýdyń paıdasyn túsindirý isinde júıeli jumys qajet», - dedi Dáýren Abaev.
