Dáýren Abaev Teńizdegi oqıǵaǵa qatysty pikir bildirdi

NUR-SULTAN. QazAqparat - Kez kelgen sheteldik bóten elde nápaqa taýyp júrgendikten, jergilikti halyqtyń mentalıtetin jaqsy bilýi kerek. Habar arnasyndaǵy «Ashyq dıalog» baǵdarlamasynda QR aqparat jáne qoǵamdyq damý mınıstri Dáýren Abaev osyndaı pikir bildirdi, dep habarlaıdy QazAqparat tilshisi.

Dáýren Abaevtyń aıtýyna qaraǵanda, qazir Teńizdegi jaǵdaı jergilikti bıliktiń tolyq baqylaýynda. Al áleýmettik jelide taraǵan sýretter men beınelerdiń qaısysy shyndyqqa jaqyn, qaısysy jalǵan ekenin arnaıy komıssııa anyqtamaq.

«Meniń bilýimshe tekserý áli júrip jatyr. Jergilikti bılik bárin baqylaýda ustap otyr. Oblys ákimi kompanııa jumysshylarymen, onyń basshylarymen kelissózder júrgizdi. Tóbeleste zardap shekken sheteldikterdi eline qaıtarý jumystary uıymdastyryldy. Kompanııanyń birinshi basshysy Qazaqstanǵa ushyp kelip, resmı túrde keshirim surady. Oblys ákiminiń birinshi orynbasary asqaratyn vedomstvoaralyq komıssııa quryldy. Ol komıssııanyń mindeti barlyǵyna birdeı eńbek jaǵdaıyn jasaý», - dedi mınıstr.

Aqparat jáne qoǵamdyq damý mınıstri bul jaǵdaıda kúsh kórsetkenderdiń de, bóten elde júrip jergilikti halyqtyń oı-sezimin qaperge almaǵan sheteldikterdiń isi durys emes degen pikir aıtady.

«Mundaı jaǵdaı endi eshqashan qaıtalanbaıtynyna sengim keledi. Qandaı sebep bolsa da adamǵa kúsh kórsetýge bolmaıdy. Solaı desek te, kez kelgen sheteldik nápaqa taýyp júrgen eldegi jergilikti halyqtyń mentalıtetin, tól erekshelikterin bilýi kerek. Jergilikti halyqtyń oı-sezimin syılaı bilýi kerek», - ded ol.