Dáýren Abaev Tarazdaǵy oqýshyny zorlaý oqıǵasy týraly pikir bildirdi
«Bul shyn máninde tym aýyr, arsyz ári óreskel qylmys. Kináli adam zań boıynsha jazasyn óteıdi. Endi, eń bastysy - zardap shekken balanyń ońaltý kýrsynan ótip, qalypty ómirge oralǵany», - dedi mınıstr «Habar» arasyndaǵy «Otkrytyı dıalog» baǵdarlamasynda.
Sonymen birge, vedomstvo basshysy zorlyq-zombylyq statıstıkasyn keltirdi.
«Mundaı qatigez oqıǵalardyń aldynda kez kelgen stastıkanyń máni joǵalady. Degenmen, Іshki ister mınıstrliginiń derekterine sáıkes, sońǵy 5 jylda kámelettik jasqa tolmaǵandarǵa qatysty qylmys sany 4 esege azaıǵan. Árıne, bul mekteptegi balalar qaýipsizdigin umyt qaldyrý degen sóz emes. Búginde elimiz boıynsha 2 myń mektep ınspektory jumys isteıdi jáne barlyq bilim oshaqtary olardyń jumys sapasyna mán berýi tıis. 2020 jyldyń 1 qańtaryna deıin barlyq bilim berý nysandary beınebaqylaý júıesimen jabdyqtalady. Tarazda bul qylmystyń aldyn ala almady, biraq bul qaýipsizdik úshin óte qajetti qural, oǵan eshkimniń talasy joq», - dep túsindirdi Dáýren Abaev.
Mınıstr balalardyń qaýipsizdigi máselesinde muǵalimder men vahterlerdiń ǵana emes, barlyq azamattardyń qyraǵy bolýy mańyzdy ekenin aıtty.
Eske sala ketsek, polıtseıler 15 qarashada Taraz qalasynda kámeletke tolmaǵan qyzdy zorlaǵan 38 jastaǵy kúdiktini ustady. Oqýshy qyzdy zorlaý oqıǵasy mektep ájethanasynda bolǵan.
Osy oqıǵadan keıin Jambyl oblysyndaǵy barlyq bilim ordalaryndaǵy qaýipsizdik sharalary kúsheıtildi. Al, zardap shekken oqýshy aýrýhanaǵa jatqyzyldy.
Búgin QR Prezıdenti Qasym-Jomart Toqaevtyń tapsyrýymen Taraz qalasynyń ákimi Qaırat Dosaev qyzmetinen bosatyldy.
QR BǴM oqıǵa bolǵan mektep dırektory, dırektordyń tárbıe isi jónindegi orynbasary, fızıka páni muǵalimi jáne vahterdiń qyzmetinen bosatylǵanyn jetkizdi. Sonymen qatar. Jambyl oblysy Bilim basqarmasynyń basshysy Rahııa Turmaǵanbetova óz erkimen jumystan ketip, birqatar jaýapty polıtsııa qyzmetkerlerine qatań sógis berilip, ýchaskelik ınspektor ishki ister organdarynan shyǵaryldy.
