Dáýren Abaev «sur tárelkelerdiń» keltirip jatqan zııany jaıynda aıtyp berdi
«Bul másele elimizdiń aqparattyq qaýipsizdigine qatysty. Qazirgi kezde 600 myńǵa tarta otbasy «sur tárelkelerdi» paıdalanyp keledi. Bul sur tárekelerde jady kartasy paıdalanylady, onda qazaqstandyq telearnalar qorǵalmaǵan. Osy oraıda shamamen 1,5 mıllıon adam Qazaqstannyń aqparattyq keńistiginen tys qalyp otyr, ıaǵnı olar qazaqstandyq telearnalardy qaramaıdy jáne elimizde ne bolyp jatqanyn bilmeıdi»,-dedi mınıstr «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasyn talqylaý barysynda.
Onyń sózine qaraǵanda, el turǵyndary «sur tárelkelerdi» paıdalanýdy jalǵastyrýda.
«Sondyqtan bul máseleni ózekti dep bilemiz. Osy qurylǵylardy adamdar paıdalanýdy jalǵastyra bermek. Bul turǵyda tutynýshylarǵa yqpal etýdiń eshqandaı sharalary bizde qarastyrylmaǵan. Alaıda biz osy kartalardy taratyp júrgen adamdyrdy quqyqtyq keńistikke shyǵarýdamyz. Olar shynymen de Qazaqstannyń quqyqtyq keńistiginen tys qalyp otyr. Elektrondy tólemder arqyly tólengen aqsha basqa elderge ketip jatyr», - dedi D. Abaev.
Aıta keteıik, mınıstr zań jobasy aıasynda BAQ-qa ákimshilik júktemeler azaıtý maqsatynda birqatar jeńildikter jasalatynyn málim etti.
«Birinshiden, buqaralyq aqparat quraldarynyń damýy úshin sapaly zańnamalyq bazany odan ary qalyptastyrý qarastyrylyp otyr. Sonyń ishinde ákimshilik júktemeler men shekteý sharalaryn azaıtý maqsatynda birqatar jeńildikter jasalady. Atap aıtqanda, azdaǵan quqyqbuzýshylyqtar úshin gazettiń tırajyn tárkileý nemese BAQ-tyń qyzmetin toqtatý sııaqty jazalardy alyp tastaý kózdelýde. Aqparat quraldaryn shyndyqqa saı kelmeıtin aqparatty taratýǵa qatysty jaýapkershilikten bosatatyn sebepter qatary da ulǵaıady. Bul ózgeris memlekettik organdardaǵy BAQ-pen baılanys jónindegi ókiletti tulǵaǵa jaýapkershilik júkteıdi»,-dep túsindirdi vedomstvo basshysy.
Talqylaýdan keıin Májilis depýtattary zań jobasyn birinshi oqylymda maquldady.
