Dáýren Abaev: Sý sapasy – qazaqstandyqtardy qatty alańdatatyn úsh máseleniń biri
«Joldaýdyń ishinen naqty bir nárseni jeke bólip aıtý qıyn. Óte kóp júıeli sharalardy qamtyǵan keshendi qujat bolyp shyqqan. Biraq shartty túrde alsaq, Prezıdent ataǵan mańyzdy tezıstiń biri –halyqty jaıylymmen qamtamasyz etý, aýyl turǵyndarynyń qolyn jaıylymdarǵa jetkizý máselesi. Aıtpaqshy, bul jergilikti ákimderdiń tıimdiligin anyqtaıtyn mańyzdy ólshem bolady. Kóbi «Jaıylymda turǵan ne bar? Aýyldyń ǵana máselesi ǵoı» dep oılaýy múmkin. Biraq bul strategııalyq mańyzy bar másele jáne bárimizge qatysy bar. Aýyldyń ǵana emes qala turǵyndaryna da qatysty. Nege? Óıtkeni dúken sórelerindegi sút pen et ónimderiniń baǵasy osyǵan táýeldi. Neǵurlym qoljetimdilik kóbirek bolsa, tańdaý aıasy de keń bolady. Al tańdaý kóp bolsa, baǵa arzanyraq bolady», - deıdi Dáýren Abaev.
Sondaı-aq, ol Joldaýda sý sharýashylyǵymen baılanysty keshendi sharalardyń jobasy aıtylǵanyn eske saldy.
«Ákimder jumysynyń tıimdiligi týraly jalǵastyratyn bolsaq, sý ınfraqurylymyn da qosa keter edim. Prezıdent búkil el boıynsha 120 sý arnasynyń ınfraqurylymyn jańǵyrtyp, 9 jańa sý qoımasyn salýdy tapsyrdy. Bul – óte úlken jumys jáne máni zor kórsetkish. Prezıdent udaıy jabyq áleýmettik saraptama alyp otyrady. Sonyń ishinde sý máselesi azamattarymyzdy alańdatatyn máselelerdiń úshtiginen túspeıdi. Keı óńirlerde sýdyń sapasy azamattar úshin jeke tabysynan da ózekti máselege aınalǵan. Bul sonshalyq alańdarlyq másele. Sondyqtan onymen aınalsý kerek. Prezıdent sondyqtan osyndaı mindet qoıyp otyr», - dedi Prezıdent ákimshligi basshysynyń birinshi orynbasary.
