Dáýren Abaev sportzaly joq aýyldarǵa jyldam boı kóteretin sporttyq nysandar salýdy usyndy

NUR-SULTAN. QazAqparat – QR Mádenıet jáne sport mınıstri Dáýren Abaev Úkimet otyrysynda sportzal tapshy aýyldy eldi mekenderge jyldam boı kóteretin sporttyq nysandar salýdy usyndy, dep habarlaıdy QazAqparat tilshisi.

«Jalpy respýblıka boıynsha 42 myńnan astam sporttyq ǵımarat bolsa, sonyń 23 myńnan astamy aýyldy jerlerde ornalasqan. Ózderińiz biletindeı, sporttyq ınfraqurylym jetispeýshiligin sheshý maqsatymen 100 dene shynyqtyrý, saýyqtyrý keshenin salý jobasy iske asyrylǵan bolatyn», - dedi Dáýren Abaev.

Onyń aıtýyna qaraǵanda, atalmysh nysandardyń keıbiri óz maqsatyna paıdalanylmaıtyn bolǵan.

«Salynǵan keshender shynymen de sport nysandarynyń jetimdiligi boıynsha ahýaldy jaqsartqanyn aıtqym keledi. Biraq bular quny qymbat jobalar ekenin aıtý kerek. Sharýashylyq turǵydan jabdyqtaýǵa úlken qarjy kerek. Olardyń keıbiri turǵyndary kóship jatqan keleshegi az eldi mekenderde salynyp ketken. Sonyń saldarynan keıbir keshender tolyq qýatymen jumys istep turǵan joq. Ǵımarattardyń quramynda maqsatyna saı qoldanylmaıtyn alańdar bar. Biz osy tásildi ózgertýdi usynamyz. Bul máseleni sheshýdiń bir joly – jyldam boı kóteretin, shyǵyny az nysandar salý. Mysaly, Soltústik Qazaqstan oblysynyń ákimdigi aýyldyq eldi mekenderdi páter ınfraqurylymymen qamtamasyz etý úshin osyndaı tájirıbeni paıdalana bastady. Bul – áldeqaıda arzan, fýnktsııanaly baı, jyldam tásil. Basqa ákimdikterden osy tásildi qarastyryp kórýdi suraımyz», - dedi mınıstr.