Dáýren Abaev SQO-da tabylǵan kóne mazar týraly aıtty

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Soltústik Qazaqstan oblysynda tabylǵan kóne mazar orny týraly pikir bildirdi, dep habarlaıdy QazAqparat tilshisi.

«Memleket basshysy Altyn Ordanyń 750 jyldyǵyn toılaý týraly tapsyrma bergen edi. Keshe ǵana Soltústik Qazaqstanda zertteý júrgizip jatqan arheologtardan qýanyshty habar jetti. Olar Altyn Orda dáýirine jatatyn kóne nysan tapty. Ázirge mazar nemese kesene degen boljam aıtylýda. Bul orynda qalashyq boldy dep aıtýǵa negiz bar. Óıtkeni, aryq júıesiniń, sýlandyrý joldarynyń qaldyǵy tabylǵan. Bul Altyn Orda mereıtoıyn toılaý qarsańyndaǵy jaǵymdy jańalyq», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Aıta keteıik, 2 qazanda arheologtar Soltústik Qazaqstan oblysy Ýálıhanov aýdanynda tarıhı mańyzy bar kóne mazarlardyń ornyn tapty.

Bul jerde qyrkúıek aıynan beri M.Qozybaev atyndaǵy SQMÝ men Pavlodar memlekettik pedagogıkalyq ýnıversıtetiniń tarıhshylary qazba jumystaryn júrgizgen.