Dáýren Abaev: Serıaldarymyzdyń jıi talqylanýy bizdiń jumysymyzdyń jaqsy nátıjesi

NUR-SULTAN. QazAqparat - Otandyq serıaldardyń jıi talqylanýy Aqparat jáne qoǵamdyq damý mınıstrligi júrgizgen jaqsy jumystyń nátıjesi. Bul týraly Astana Media Week-tiń serıaldyq ónimderdi ázirleý jáne shyǵarý taqyrybyna arnalǵan jalpy otyrysynda QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Búgingi paneldik sessııanyń taqyryby da ózekti. Serıal - bul televızııanyń aıryqsha ónimi. Ózderińiz de jaqsy bilesizder, álemde serıal boıynsha bıznes-ındýstrııa qalyptasty. Kóptegen serıaldar túsirilip jatyr. Olar tek qarjy turǵysynan ǵana emes, qoǵamǵa yqpal etý jaǵynan da kórermenge erekshe áser syılaıdy», - dedi mınıstr.

Osy oraıda ol 2-3 jyl buryn qoǵam tarapynan otandyq telearnalarda sheteldik - túrik, úndi serıaldarynyń tym kóbeıip ketkeni týraly synı maqalalar men posttar kóp jazylǵanyn aıtty. Oryndy aıtylǵan eskertpeler de az bolmaǵanyn atap ótti.

«Al qazir qarasańyzdar, úndi serıaldary, túrik serıaldary da bar. Biraq, bizdiń serıaldarǵa qatysty syn, oı talqylanady. Bul meni qýantady. Árıne, kontent sapasyna qatysty syn aıtylǵany jón. Alaıda, sheteldik serıaldardan góri ózimizdiń serıaldardy talqylap jatqany biz júrgizgen jumystyń jaqsy nátıjesi dep bilemin»,- dedi Dáýren Abaev.