Dáýren Abaev ruqsat etilgen mıtıng pen zańsyz mıtıngtiń aıyrmashylyqtaryna toqtaldy
Áýeli mınıstr mıtıng ótkizý úshin arnaıy oryndar belgileýdiń qandaı qajeti bar ekenine toqtaldy.
«Mıtıngke qalyptan tys dúnıe retinde qaraýdy qoıý kerek. Ylǵı aıtyp kelemin, bul qalypty, búkil álemde bar tájirıbe. Eń bastysy, mıtıng barysynda tártipsizdikke jol bermeı, bireýdiń múlkine zaqym kelýin boldyrmaý kerek. Kelisetin shyǵarsyz, eshkimniń sol mıtıng kezinde dúkeniniń sóreleri qıraǵan kásipkerdiń ornynda bolǵysy kelmeıdi. Sol úshin bılik mıtıngter úshin arnaıy oryn bóledi, tártip kúzetin uıymdastyrady. 30 maýsymda bári dál osylaı boldy. Úsh aktsııa da mádenıetti beıbit jıyn ótkize alatynymyzdy kórsetkenin aıtqym keledi. Mıtıng barysynda alýan túrli urandar men talaptar aıtyldy. Osynyń bári BAQ-ta jaryq kórdi. Men bılik halyqpen órkenıetti dıalog qurýǵa daıyn ekenin ylǵı aıtyp kelemin. Shetin sharalarǵa baryp, tyıym salynǵan uıymdardyń arandatýshylyq urandaryna erýdiń qajeti joq. Azamattardyń óz talaptaryn lıgıtımdi arnada aıtýyna shynaıy jaǵdaı jasalyp otyr», - dedi Dáýren Abaev.
Baǵdarlama barysynda ol jastardyń «Zeren» atty jazǵy lageri bastaý alǵanyn da aıtty.
«Búgin Aqmola oblysynda jastardyń lageriniń alǵashqy kezegi bastaý aldy. Dál osyndaı úsh kezek bolady. Shildeniń sońyna deıin jalǵasýy kerek. Bul aýqymdy jumys Jastar jyly qarsańynda ótip otyr. Basty maqsaty - ómirdiń ár salasynda ozyq tanylǵan belsendi jastardyń basyn qosý. Olardyń arasynda tipti «100 jańa esim» jeńimpazdary da, sheteldegi qazaq dıasporalarynyń ókilderi de, jas kásipkerler men eriktiler de bar. TMD jastarynyń ókilderin de shaqyrdyq. «Zeren» lageri tynyǵyp, kóńil kóterý úshin jasalyp jatqan joq. Trenıngter ótip, sheberlik sabaqtary uıymdastyrylady. Jańa ári biregeı jobalar lager alańynda daıyndalyp, tanystyrylady. Tipti ondaı jobalardyń alǵa basýyna kúsh salý kózdelgen», - dedi Dáýren Abaev.
