Dáýren Abaev «Rýhanı jańǵyrý» aıasyndaǵy jobalardyń júzege asyrylý barysymen tanysty

ALMATY. QAZAQPARAT - Qazaqstan Respýblıkasynyń Aqparat jáne kommýnıkatsııalar mınıstri Dáýren Abaev «Rýhanı jańǵyrý» baǵdarlamasy aıasyndaǵy jobalardyń júzege asyrylýymen tanysty. Olar: «Qozy Kórpesh - Baıan-sulý» jáne «Batyrlar» ulttyq serıaldary, dep habarlaıdy «QazAqparat» HAA tilshisi.

Mınıstr osy sharada Baıan Maqsatqyzynyń prodıýserligimen daıyndalǵan teleónimmen tanysty. Prodıýser qazaqtyń tamasha halyqtyq poemasy «Qozy Kórpesh - Baıan sulý» lıro-epostyq jyrynyń jelisimen kıno túsirgen. Fılmge «Qazaqstan» Ulttyq telearnasy tapsyrys bergen. Kezdesýde ónerpazdar ujymy mınıstrge serıaldyń montajdalǵan bóligi men tızerin kórsetken.



«Bul - biz qolǵa alǵan eń kúrdeli joba. Tarıhı serıaldy túsirý óte qıyn. Biraq, soǵan qaramastan, bizdiń komanda táp-táýir týyndy shyǵarýǵa tyrysyp baqty. Eposty ekranda qaıta jańǵyrtý úlken jaýapkershilik júkteıtinin aıtqym keledi, onyń ústine onyń óte kóp nusqasy bar. Biraq kórermenge sapaly dúnıe usyný úshin qolymyzdan kelgenin jasadyq», - deıdi serıal prodıýseri Baıan Maqsatqyzy.



Dáýren Abaev «Habar» telearnasynyń jańa maýsymyna ázirlenip jatqan taǵy bir ulttyq serıaldyń lokatsııasymen tanysty. Qazaq batyrlary jaıyndaǵy serıaldy rejısser Asqar Uzabaev Jońǵar Alataýynda túsirip jatyr. Dáýren Abaev qazirshe «Batyrlar» dep atalyp otyrǵan osy serıaldyń bir epızodynyń túsiriliminde boldy.



«Elbasynyń tikeleı tapsyrmasymen otandyq serıaldardy kóbeıtý ústinde jumys istep jatyrmyz. Barlyǵy oıdaǵydaı júrip jatsa, bıyl halyqqa 39 serıal usyný josparda bar. Biz munda qanshalyqty kúrdeli jumys júrip jatqanyn, jobaǵa kóptegen adamdar jumyldyrylǵanyn kórsetý úshin keldik. Serıal túsirý jumysyn uıymdastyrý, myna kostıýmderdi tigý - munyń barlyǵy ońaı tirlik emes. Biraq negizgi baǵany kórermen beredi. Sondyqtan, bul jaqsy bolady dep úmittenemin», - dep atap ótti Dáýren Abaev.



Іssapar aıasynda Dáýren Abaevqa Aqparat jáne kommýnıkatsııalar mınıstriniń ózi qaıtara almaıtyndaı usynys jasaldy.
«24 saǵat tabıǵat qushaǵynda» jańa realıtı-shoýynyń tusaýkeserinde «Qazaqstan» RTRK» AQ basqarma tóraǵasy Erlan Qarın Aqparat jáne kommýnıkatsııalar mınıstri Dáýren Abaevty baǵdarlama habarlarynyń birinde qonaq bolýǵa shaqyrdy. Mınıstrdiń ózi aıtqandaı, endi shoý-24 habaryna qatysý úshin bos ýaqyt tabý máselesin sheshý ǵana qaldy.