Dáýren Abaev: Prezıdenttiń Qytaıǵa saparynyń baǵdarlamasy óte mazmundy boldy

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Memleket basshysy Qasym-Jomart Toqaevtyń Qytaıǵa memlekettik saparyna qatysty pikirin bildirdi, dep habarlaıdy QazAqparat tilshisi.

«Memleket basshysynyń Qytaıǵa saparynyń baǵdarlamasy óte mazmundy boldy. Іskerlik ortamen kelissózder júrgizilip, ártúrli alańda sóz sóılendi, eń joǵarǵy deńgeıdegi ekijaqty mańyzdy kezdesýler ótti. Bul sapardyń nátıjesi – eń batyl boljamdardan asyp tústi», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Mınıstrdiń aıtýynsha, kelissózder kezinde qos tarap «Elbasy negizin qalap ketken qarym-qatynasty saqtaýǵa» mańyz berildi.

«Júrgizilgen kelissózder barysynda meniń bilýimshe, kóptegen kelisimderge qol jetkizildi. Yntymaqtastyqtyń barlyq mańyzdy salalary - kólik, logıstıka, aýyl sharýashylyǵy bári qamtyldy. Qasym-Jomart Kemelulynyń Qytaı tóraǵasy Sı Tszınpınmen kezdesýi jyly ári dostyq sıpatta ótti», - dedi ol.

Baǵdarlama júrgizýshisi áleýmettik jelide Prezıdenttiń qazaq tilimen birge qytaı tilinde sóıleýine qatysty aıtylyp jatqanyn tilge tıek etti. Buǵan kelgende Dáýren Abaev Qazaqstan Prezıdentiniń qytaı tilin bilgenine maqtanýymyz kerek degen pikir bildirdi.

«Kez kelgen tildi, ásirese qytaı tilin bilý – kóp jyldar boıǵy tabandy eńbektiń nátıjesi. Prezıdenttiń Tramppen, Pýtınmen, Makronmen, Sı Tszınpınmen aýdarmashysyz sóıleıtinin qazaqstandyqtar óte jyly qabyldaıtynyn anyq bilemin. Bul sózsiz, qosymsha dıplomatııalyq salmaq berip, bizdiń saıasattyń ıntellektýaldyq, progressıvti jaǵyn kórsetedi», - dedi Dáýren Abaev.

Eske salaıyq, Qazaqstan Prezıdenti Qasym-Jomart Toqaev Qytaı Halyq Respýblıkasynda 2 kúndik memlekettik saparmen júr. Q. Toqaev QHR Tóraǵasy Sı Tszınpınmen kelissózder ótkizdi. QHR Memlekettik keńesiniń Premeri Lı Ketsıanmen, QHR Búkilqytaılyq halyq ókilderi jıyny turaqty komıtetiniń tóraǵasy Lı Chjanshýmen kezdesti.

Sondaı-aq Qazaqstan-Qytaı Іskerlik keńesiniń 6-shy otyrysyna qatysty.

Al Hanchjoýǵa sapary aıasynda ınnovatsııalyq ónimderdi álemdik naryqqa shyǵarý boıynsha kóshbasshy «Hikvision» kompanııasynyń jumysymen tanysty. Hanchjoý qalasynyń mádenı nysandaryn aralady. Odan keıin Qytaı Kompartııasynyń Chjetszıan provıntsııasyndaǵy hatshysy Che Tszıýnmen júzdesti.