Dáýren Abaev prezıdentterdiń telefon arqyly sóılesýin uıymdastyrýdyń mán-jaıyn aıtyp berdi
Mınıstr óz sózinde bıyl elimizde saıası, ekonomıkalyq, mádenı jáne basqa da salalarda óte mańyzdy sharalar ótkenin aıta kele, «Elbasy Nursultan Nazarbaev pen Amerıka Qurama Shtattarynyń Prezıdenti Donald Tramptyń telefon arqyly sóılesýi de qoǵamdastyq nazarynda boldy. Kúndelikti ómirde adamdar óz sharýasymen táýligine ondaǵan márte emin-erkin telefon shalyp, máselesin sheship jatady. Al memleket basshylary arasynda telefon arqyly baılanysqa shyǵý - ol bir tolyqqandy kezdesý ótkizgenmen teń. Sebebi prezıdentter deńgeıinde osyndaı áńgimelesý barysynda kóptegen mańyzdy taqyryptar qamtylady», - dedi D. Abaev.
Osy oraıda mınıstr memleket basshylary telefon arqyly pikir almasý ótkizer aldynda eki eldiń syrtqy saıası vedomstvolary máselelerdi ózara pysyqtaıtynyn, bul sharalar prezıdentter jumysynyń kestesine engiziletinin atap ótti.
«Vashıngton men Astana arasynda 12 saǵattyq aıyrmashylyq bar. Sondyqtan telefon arqyly baılanystyń datasy men ýaqytyn sınhrondaý - ol óte aýqymdy uıymdastyrýshylyq jumysty talap etedi», - dedi vedomstvo basshysy.
Telefon arqyly sóılesýge AQSh jaǵy bastamashy bolǵanyna toqtalǵan D. Abaev, bul óz kezeginde óte mańyzdy nıettestikti bildiretinin sóz etti.
«Eki el memleket basshylarynyń bul áńgimesi «EKSPO-2017» kórmesine AQSh-tyń prezıdenttik delegatsııasy kelgennen keıin ótti. Osynyń aıasynda uıymdastyrylǵan kezdesýlerden týyndaǵan áserden keıin prezıdentter telefon arqyly sóılesti. Osy oraıda birqatar máseleler ózara baılanysyp jatyr. Donald Tramptyń Elbasy Nursultan Nazarbaevty Vashıngtonǵa resmı saparmen kelýge shaqyrýy da óte jaqsy belgi dep bilemin», - dedi mınıstr.
Budan buryn habarlanǵandaı, qyrkúıek aıynyń basynda Nursultan Nazarbaev Amerıka Qurama Shtattarynyń Prezıdenti Donald Tramppen telefon arqyly sóılesti. Áńgimelesý barysynda Donald Tramp Qazaqstan Prezıdentin Astanadaǵy «EKSPO-2017» halyqaralyq kórmesiniń tabysty ótýimen quttyqtap, Amerıka delegatsııasynyń osy is-sharaǵa qatysý nátıjelerin joǵary baǵalady.
Esterińizge sala keteıik, bıyl tamyzdyń aıaǵynda AQSh-tyń prezıdenttik delegatsııasy «EKSPO-2017» kórmesine kelgen bolatyn.
