Dáýren Abaev: Parıj Olımpıadasy kásibı daıyndyǵymyzdyń kórsetkishi bolady

NUR-SULTAN. QazAqparat – Parıj Olımpıadasy Qazaqstan sportshylarynyń kásibı daıyndyǵynyń kórsetkishi bolady. Bul týraly 2024 jyly Parıjde ótetin Olımpıadaǵa daıyndyq máseleleri jóninde keńes ótkizgen QR Mádenıet jáne sport mınıstri Dáýren Abaev aıtty, dep habarlaıdy QazAqparat tilshisi.

«Ózderińizge belgili, eki jyldan keıin – Parıj Olımpıadasy. Tórtjyldyqtyń basty dodasyna osy jıynnan bastap qyzý daıyndyqqa kirisýimiz qajet. Biz buǵan deıin kadrlyq, bıýrokratııalyq barlyq máseleni sheshtik dep oılaımyn. Biraq, bizdi odan da úlken, jaýapty jumystar kútip tur. Parıj Olımpıadasy kásibı daıyndyǵymyzdyń kórsetkishi bolmaq», - dedi mınıstr.

Onyń atap ótýinshe, ár jaqsy nátıje úshin federatsııa basshylary, jattyqtyrýshylar, bapkerler, tıisti sala mamandary jeke-jeke jaýapty bolady.

«Tokıo men Beıjiń oıyndary sportshylarymyzdyń daıyndyǵyna qatysty máseleniń kúrdelenip ketkenin kórsetti. Olardyń keıbiri, tipti Lıllehammerdegi, Atlantadaǵy oıyndardan beri kele jatqanyn baıqaýǵa bolady. Frantsııada sol olqylyqtardyń barlyǵyn túzeýimiz qajet», - dedi Dáýren Abaev.

Foto: www.facebook.com/Daýren Abaev