Dáýren Abaev otandyq serıaldar týraly: Biz kórermenniń pikirin bilemiz
Mınıstrdiń aıtýynsha, búginde otandyq serıaldardy damytý jumysyna negizgi basymdyq berilip otyr. Bul - Memleket basshysynyń tikeleı tapsyrmasy.
«Biz xalqymyzdyń salt-dástúrin, tarıxy men erekshe qundylyqtaryn nasıxattaıtyn teleónimderge basa nazar aýdaryp otyrmyz. Máselen, ótken jyly ártúrli janr men taqyrypta 40 serıal kórermenge usynyldy. Otandyq telexıkaıalardy tek memlekettik arnalarǵa emes, kommertsııalyq telearnalarǵa da tapsyrǵan bolatynbyz. Ol serıaldar arqyly qoǵamnyń áleýmettik tustary - otbasylyq qundylyqtar, bereke men birlikti nasıxattap, xalqymyzdyń baı tarıxy men dástúrin kórsetýge tyrystyq», - dedi D.Abaev «Qazmedıa» ortalyǵynda ótken kezdesýde.
Dáýren Áskerbekuly serıaldardyń reıtıngi birden kóterilmeıtinin jetkizdi. Sebebi kórermen qaýymnyń talǵamy áralýan.
«Eń bastysy, osy jumystar shyǵarmashylyq toptardyń kásibı deńgeıin ósirýge yqpal etedi dep senemiz. Biz qurmetti kórermenderimiz ben zııaly qaýymnyń pikirin de bilip otyrmyz.
«Ekrandy sheteldik serıaldar jaýlap aldy» dep jatqandar da bar. Sondyqtan biz aldymyzǵa aýqymdy strategııalyq maqsat qoıdyq. Ol maqsatymyz - sapaly otandyq telefılmderdiń sanyn arttyrý, kórermen talǵamyna saı jaqsy serıaldardy túsirý», - dep atap kórsetti D.Abaev.
