Dáýren Abaev otandyq BAQ-ty damytý jónindegi josparlar týraly aıtyp berdi (VIDEO)
Astanada Baılanys jáne aqparat qyzmetkerleri kúnine oraı ótken saltanatty jıynda mınıstr búginde otandyq BAQ-ty damytýda birqatar problemaly baǵyttar bar ekenin atap ótti. Osy rette vedomstvo bul máselelerge erekshe mán bermek.
«Birinshiden, mańyzdy mindetterdiń biri - ol jýrnalıstiń mártebesin kóterý, onyń múddeleri men quqyqtaryn qorǵaý. Ekinshiden, buqaralyq aqparat quraldary úshin memlekettik organdardyń ashyqtyǵy men qoljetimdiligin budan ary arttyrý. Bul másele eki jaqtyń múddesin kózdep otyr, ıaǵnı memlekettik bastamalardy der kezinde, obektıvti jáne shynaıy túsindirý qoǵamdyq turaqtylyqtyń mańyzdy faktorlarynyń biri»,-dedi D. Abaev.
Úshinshiden, jýrnalıstıka fakýltetterinde oqytý baǵdarlamalaryn ózektendirý jumystary júrgizilip, osy rette tájirıbelik jumystardyń úlesi artyp, stýdentter túrli basylymdarda taǵylymdamany bastaıdy.
«Tórtinshiden, biz óńirlik BAQ-ty damytýǵa aıryqsha nazar aýdaratyn bolamyz. Kóptegen óńirlerde táýelsiz basylymdardyń bolmaýynan, jergilikti jerlerde ózekti problemalar birden seziledi»,-dedi mınıstr.
