Dáýren Abaev Ortalyq kommýnıkatsııalar qyzmetine qatysty pikir bildirdi
«Búgin Memleket basshysynyń Jarlyǵymen Ortalyq kommýnıkatsııalar qyzmeti QR Prezıdenti Ákimshiliginiń basqarýyna berildi. Bárinen buryn, úsh jyldan astam ýaqyt birge jumys istegen OKQ qyzmetkerlerine jyly lebizimdi bildirgim keledi. Qurmetti áriptester, sizderdiń kúsh-jigerlerińiz ári tynymsyz eńbekterińizdiń arqasynda Qyzmet jumysyn aıtarlyqtaı jańǵyrtyp, onyń tıimdiligi men bedelin jýrnalıster, sarapshylar jáne qoǵamdastyq aldynda arttyrýǵa múmkin boldy. Sońǵy býyndy tehnıkamen jabdyqtalǵan jańa baspasóz ortalyǵynyń ashylýyn bizdiń ortaq úlken jetistigimiz dep sanaımyn», - dep jazdy Dáýren Abaev áleýmettik jelidegi paraqshasynda.
Osy oraıda mınıstr atalǵan medıa-alań Elbasynyń, Qazaqstan Prezıdentiniń, sondaı-aq BAQ ókilderiniń joǵary baǵasyna ıe bolǵanyn atap ótti. Tek 2019 jyly osynda 127 shara ótkizildi, ıaǵnı baspasóz máslıhaty, telekópir, sarapshylyq pikir almasý, óńirler men shetelge tikeleı baılanysqa shyǵý uıymdastyryldy. Sonymen qatar vedomstvo basshysy OKQ alańynda Qazaqstan Prezıdenti saılaýynyń nátıjesi jarııalanǵanyn eske saldy.
Ortalyq kommýnıkatsııalar qyzmeti minbesinen túrli rezonansty oqıǵalar boıynsha málimet taratylǵanyna toqtalǵan D. Abaev, «Elimizdegi qoǵamdyq-saıası kún tártibi ekpindi túrde ózgerýde. Osy rette aqparattyq blok aldynda jańa mindetter bar. Sondyqtan Memleket basshysynyń búgingi sheshimi osynyń barlyǵyn eskerip, qamtyp tur. Osyǵan baılanysty barshańyzǵa shyn júregimnen sáttilik tileımin jáne isterińiz tek alǵa bassyn. Rahmet!», - dedi.
Budan buryn habarlanǵandaı, Memleket basshysy QR Prezıdenti janyndaǵy «Ortalyq kommýnıkatsııalar qyzmeti» respýblıkalyq memlekettik mekemesin qurý jónindegi Jarlyqqa qol qoıdy.
Prezıdent Ókimimen Talǵat Qalıev QR Prezıdenti janyndaǵy Ortalyq kommýnıkatsııalar qyzmetiniń basshysy bolyp taǵaıyndaldy.
