Dáýren Abaev: Náresteni óltirýge shaqyrý sóz bostandyǵy ma
«Ótken aptada Astanada HH Ortalyq Azııa BAQ konferentsııasy bolyp ótti. Bul shara EYQU uranymen uıymdastyrylyp, onda Qazaqstandaǵy sóz bostandyǵy máselesi kóterilgen bolatyn. Osy salaǵa jaýapty mınıstr retinde aıtylǵan eskertýlerge qandaı jaýap berer edińiz?» - dep suraq qoıdy baǵdarlama júrgizýshisi.
Dáýren Abaev óz jaýabynda atalmysh shara - sóz bostandyǵy men jýrnalıster quqyǵy boıynsha aımaqtaǵy basty pikirtalas alańy ekenin eske saldy.
«EYQU-nyń mereıtoılyq konferentsııasynyń Astanada Aqparat jáne kommýnıkatsııalar mınıstrliginiń qatysýymen ótip jatqany - bizdiń dıalogqa daıyn ári eskertýler men keńesterdi qabyldaı alatynymyzdy bildiredi. Men EYQU-nyń BAQ erkindigi boıynsha ókili Arlem Dezırmen kezdestim. Basqosý barysynda biz ary qaraı yntymaqtasa jumys isteý joldaryn talqyladyq. Synǵa qatysty aıtar bolsam, onda Qazaqstan ǵana emes, barlyq Ortalyq Azııa elderi talqylanǵanyn atap ótýimiz kerek. Dezır myrza óz sózinde Qazaqstandyq BAQ-taǵy sóz bostandyǵynda aıtarlyqtaı progress baryn aıtty», - dedi mınıstr.
Dáýren Abaev óz sózinde Ortalyq Azııadaǵy ózge memleketterdeı Qazaqstannyń atyna da birshama keńes berilgenin tilge tıek etti.
«Máselen, bizdiń eýropalyq áriptester Qylmystyq kodekstiń keıbir baptaryn qylmys dep tanymaý kerektigin aıtty. Mysaly, áleýmettik, ulttyq nemese dinı alaýyzdyq týǵyzý týraly bapty jáne jalǵan aqparat taratqany úshin qarastyrylǵan bapty alyp tastaýdy usynady. Biraq, bizdiń oıymyzsha bul - jeti ret ólshep, bir ret kesýdi talap etetin másele», - deıdi ol.
Dáýren Abaev áńgime barysynda Arlem Dezır myrzanyń esine Frantsııada jýyq arada tirkelgen bir oqıǵany salǵanyn atap ótti.
«Ondaǵy bir belgili reper óz áninde «aq násildi nárestelerdi óltirip, olardyń ata-anasynyń aıaq-qolyn shaýyp tastaýǵa» shaqyrǵan. Frantsýz qoǵamy bul ánge úlken narazylyq tanytqanymen, keıbir quqyq qorǵaýshylar sóz bostandyǵy retinde ándi aqtap almaq bolǵan. Ózińiz qalaı oılaısyz? Nárestelerdi óltirýge shaqyrý týraly án - sóz bostandyǵy ma? Álde, bul zorlyq-zombylyqqa shaqyrý ma? Bizde 100 ulttyń ókilderi turatynyn umytpaıyq. Biz kópkonfessııaly elmiz. Eger bári de erteń osyndaı «ónerge» berilip ketse, qaıtpek kerek? Beıbitshilik, kelisim men azamattardyń jaıly ómiri - bizdiń basty baılyǵymyz. Mine, biz osy týraly eshqashan umytpaýymyz kerek», - dedi Dáýren Abaev.
