Dáýren Abaev Mı-8 tikushaǵynyń apatqa ushyraýyna qatysty pikir bildirdi

NUR-SULTAN. QazAqparat - Aqparat jáne qoǵamdyq damý mınıstri Dáýren Abaev Qyzylorda oblysy Jalaǵash aýdanynda apatqa ushyraǵan Mı-8 tikushaǵyna qatysty jaǵdaıǵa pikir bildirdi, dep habarlaıdy QazAqparat tilshisi.

«Eń aldymen, qaza tapqandardyń týǵan-týystaryna, otbasylaryna qaıǵyra kóńil aıtqym keledi. Bul - orny tolmas aýyr qaza. Búkil halyq olarmen birge qara jamyldy. Prezıdent málim etkendeı, marqumdardyń otbasylaryna barlyq qajetti materıaldyq kómek kórsetiletin bolady. Qorǵanys mınıstrligi turaqty túrde jaǵdaı týraly aqparat taratýda. Bizge Qorǵanys mınıstrliginiń janynan qurylǵan komıssııa júrgizetin tergeý jumystarynyń resmı nátıjesin kútý ǵana qaldy», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady.Qorǵanys mınıstrliginiń aqparatyna sáıkes, atalǵan tikushaq Aqtaý qalasynan Shymkentke bet alǵan 4 áskerı tikushaq quramynda bolǵan. Barlyq ekıpaj múshesi - 13 adam qaza tapty.

Qorǵanys mınıstrligi qaza tapqan áskerı qyzmetshilerdiń esimderi men fotosýretterin jarııalady.