Dáýren Abaev menıngıtke qatysty jaǵdaı boıynsha pikir bildirdi
«Biz menıngıt boıynsha halyqtyń nelikten dúrlikkenin túsinip otyrmyz. Meniń oıymsha, Densaýlyq saqtaý mınıstrligi búgingi tańda bul aýrýǵa qatysty aqparattandyrýdyń barlyq amaldaryn júrgizip jatyr. Másele adamdardyń ólimine qatysty bolyp otyrǵandyqtan, dúrligý bolady. Adamdar balalaryn joǵaltyp jatqan kezde dúrbeleń týady. Sondyqtan, ony túsinýge de bolady», - dedi mınıstr Astanada turǵyndardy qabyldaýdan keıin tilshilerdiń suraǵyna jaýap bere otyryp.
Bul rette mınıstr resmı aqparat kózderine sený kerektigin atap ótti.
«Biz eń birinshi kezekte resmı kózderden - Densaýlyq saqtaý mınıstrliginen, densaýlyq saqtaý basqarmalarynan taraǵan aqparattarǵa basa nazar aýdarýdy, sońy jalǵan bolyp shyǵatyn kóptegen bos aqparattardan aýlaq bolýdy suraımyz», - dedi mınıstr.
Sonymen qatar, Dáýren Abaev keıbir sheneýniktermen baılanysqa shyǵý qıynǵa túsetinin de joqqa shyǵarǵan joq.
«Iá, jalpy mundaı másele bar. Ártúrli sheneýniktermen keri baılanys ornatý qıynǵa túsip jatady. Sebebi, olar tekserilýi tıis resmı aqparattardy beretin jaǵdaılar bar. Sondyqtan, kidiris bolyp qalady. Adamdar dúrligýi múmkin, biraq laýazymdy adamǵa bul keshirimdi emes. Mine, osy máselege biz nazar aýdaryp, «Altyn ýaqyt» degen ereje engizdik. Demek, olar úsh saǵattyń ishinde jaýap berýi tıis», - dedi Dáýren Abaev.
