Dáýren Abaev «Kókjaılaý» taý kýrorty qajet ekenin aıtty
ASTANA. QazAqparat - Búgingi tańda Qazaqstanda taý kýrortyna degen suranys artyp keledi. «Shymbulaqqa» kelýshilerdiń shamadan tys kóbeıýi de osyny rastaıdy. «Habar» telearnasyndaǵy «Ashyq áńgime» baǵdarlamasynda QR Aqparat jáne kommýnıkatsııalar mınıstri Dáýren Abaev osyndaı pikir aıtty, dep habarlaıdy QazAqparat tilshisi.
Suhbat kezinde Dáýren Abaev «Shymbulaq» taý kýrortyna kelýshiler shamadan tys artýyna jáne osyndaı kýrorttarǵa degen suranystyń joǵary bolýyna baılanysty, Almatyda taǵy bir kýrort salý qajet bolyp otyrǵanyn aıtty.
«Búgingi tańda biz týrızmdi damytý úshin qolda bar rekreatsııalyq múmkindikterdi paıdalanýǵa tıispiz. Týrızmniń álemdik jalpy ishki ónimdegi úlesi 10 paıyzdan asady, bul 8 trln dollar degen sóz. Biz týrıster úshin kúresýimiz kerek. Qala mańynda ornalasqan taýlar - Almatynyń basty artyqshylyǵy», - dedi mınıstr.
Almatyda kýrort salý máselesi áli talqylanyp jatyr, al kórshi elder taý-shańǵy ındýstrııasyn qarqyndy damytýǵa kúsh salýda.
«Máselen, Ózbekstanda 100 mln dollardan astam ınvestıtsııa quıý arqyly úlken kýrort ashylmaq. Qyrǵyzstannyń Qarakól aýdanynda úlken eki kýrort salynyp jatyr. Ázerbaıjanda endi ǵana ashylǵan taý-shańǵy kýrortyna 100 myń adam baryp úlgerdi», - dedi D.Abaev.
Mınıstrlik basshysy 2014 jyly usynylǵan taý-shańǵy kýrortynyń birinshi jobasynda tabıǵat landshaftyn birshama ózgertý kózdelgenin, negizinen qaltaly sheteldikterge arnalǵanyn eske saldy.
Budan tys, D.Abaev osy jobany iske asyrý kezinde barlyq ekologııalyq máseleler eskeriletinine senim bildirdi.
«Qazir ákimdik qurylys máselesin qaıta qarap shyqty. Jyl boıy jumys isteıtin, jurttyń bárine qoljetimdi kýrort salý josparlanyp otyr. Trassanyń jospardaǵy uzyndyǵy qysqardy, ǵımarattardyń aýmaǵy shamamen 10 ese kishireıdi. Osynyń bári ekologııaǵa áserdi azaıtady», - dep túıindedi mınıstr.
