Dáýren Abaev qazaqstandyqtardy belgisiz batyrlar týraly jazýǵa shaqyrdy

ASTANA. QazAqparat - Búgin Úkimet úıinde ótken baspasóz máslıhatynda QR Aqparat jáne kommýnıkatsııalar mınıstri Dáýren Abaev qazaqstandyqtardy belgisiz batyrlar jaıynda jazýǵa shaqyrdy, dep habarlaıdy QazAqparat.

«Joba «Qazaqstannyń 100 jańa esimi» dep atalady. Biz elimzidiń ıgiligi úshin jumys isteıtin, belgisiz batyrlar dep aıta alatyn keminde 100 adam tapqymyz keledi. Barynsha tolyq aqparatty tamyz aıynda usynatyn bolamyz. Qazirdiń ózinde myń  ótinim tústi. Onyń 300-den astamyn  el.kz saıtynan taba alasyzdar. Barlyq azamatty bul jobaǵa belsendi qatysýǵa shaqyramyn. Bizdiń elimizdiń damýyna zor úles qosqan nemese qosyp júrgen, biraq ony eshkim bilmeıtin tanystaryńyz, kórshilerińiz bar shyǵar. Igilikti isti birigip atqaraıyq. Ol adamdar týraly saıtta jazyńyzdar. Biz mindetti túrde qarap, tizimge qosatyn bolamyz. Aıtarlyqtaı ólshemsharttar men shekteýler joq. Menińshe, árbir tarıh jeke qarastyrylýy tıis», - dedi ol.

Onyń aıtýynsha, ótinimder 15 qyrkúıekke deıin qabyldanyp, odan keıin daýys berý júrgiziledi.

Esterińizge sala ketsek, Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda búgingi zamandastarymyzdyń jetistikteriniń tarıhyna da nazar aýdarýdy usynyp, bul ıdeıany «Qazaqstandaǵy 100 jańa esim» jobasy arqyly iske asyrǵan jón bolatyndyǵyn aıtqan edi.  

«Qazaqstandaǵy 100 jańa esim» jobasy - Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarıhy. Jobada naqty adamdardyń taǵdyrlary men ómirbaıandary arqyly búgingi zamanaýı Qazaqstannyń kelbeti kórinis tabady», - degen edi Elbasy.