Dáýren Abaev Qazaqstan men túrki álemi týraly pikir bildirdi
«Prezıdent Toqaevtyń Túrki memleketteri yntymaqtastyq keńesine, qazirgi uıymyna qatysýy qoǵamda saıasattanýshylar arasynda da, qarapaıym ınternet-kommentatorlar arasynda da úlken qyzyǵýshylyq týdyrdy. Pikirler aýany negizinen jaǵymdy. Biraq Qazaqstan syrtqy saıası yntymaqtastyqtyń basymdyqtaryn ózgertedi jáne túrki baǵyty álemniń basqa polıýsterindegi dostyqqa balama bolady degen tezıster tuspaldanǵan jarııalanymdar da boldy. Shynynda da solaı ma?», - dep suraq qoıdy jýrnalıst «Habar» arnasyndaǵy «Ashyq dıalog» baǵdarlamasynda.
«Birinshiden, biz syrtqy saıasattaǵy basymdyqtardy ózgertpeımiz. Túrki álemi qashanda onyń negizgi vektorlarynyń biri bolyp keldi. Bul týraly Elbasy da, Prezıdent te birneshe ret aıtqan. Kaspııden Alataýǵa deıingi búkil ońtústik shekaramyz túrki elderimen astasyp jatyr. Árıne, olarmen tarıhı, mádenı jáne rýhanı baılanystar týraly aıtpaı-aq qoıaıyn. Qazaqstan eshqashan bireýge qarsy dos bolmaıdy. Kerisinshe kópvektorly jáne pragmatızmniń úlgisi bolǵan syrtqy saıasatymyzdyń máni – álemdik saıasattyń barlyq «polıýsterimen» barynsha tıimdi jáne seriktestik qatynastar qurý bolyp otyr. Reseımen odaqtastyq qatynastarymyz bar, Qytaımen, AQSh-pen, Eýropalyq odaqpen strategııalyq áriptestik jolǵa qoıylǵan. Biz birneshe uıymdar men kelisimder aıasynda yntymaqtastyqty damytýdamyz. Sondyqtan, osyndaı túsiniksiz tuspaldary bar maqalalar tyrnaq astynan kir izdeýmen bireı», - dep jaýap berdi Dáýren Abaev.
Aıta keteıik, 14 qarashada Qazaqstan Prezıdenti Qasym-Jomart Toqaev Ystanbulda túrki elderiniń Memleket basshylarymen birge sammıtke qatysty. Onyń nátıjesi boıynsha «Túrkitildes memleketterdiń yntymaqtastyq keńesi» «Túrki memleketteri uıymy» dep ataldy.
