Dáýren Abaev: Islam álemin bir jerde toǵystyrý - Elbasynyń bedeli

ASTANA. QazAqparat - Islam álemin bir jerde toǵystyrý - Elbasynyń bedeli. Mundaı pikirdi búgin «Habar» telearnasyndaǵy «Ashyq suhbat» baǵdarlamasynda elimizdiń Aqparat jáne kommýnıkatsııalar mınıstri Dáýren Abaev bildirdi.

Baǵdarlama barysynda mınıstr elimizde latyn álipbıine kóshý, medıtsınalyq saqtandyrý, tipti, Abý-Dabı plaza qurylys keshenindegi janjaldyń qoǵam arasynda keńinen talqyǵa túskenin atap ótti.

«Bulardyń barlyǵyna toqtalǵym kelmeıdi. Óıtkeni, olar qoǵamda keńinen talqyǵa tústi. Biraq, men aıtylǵanymen barynsha nazar aýdarýdy qajet etetin sharalarǵa kóńil aýdarǵym keledi. Onyń birinshisi - Islam yntymaqtastyq uıymynyń sammıti. Oılap kórińizdershi - 83 eldiń delegatsııasy Astanada bas qosty. Mundaı sammıti qýatty elderdiń ózine ótkizý barysynda biraz qıyndyqtar týǵyzatyn edi. Demek, bul rette barlyq memlekettik organdardyń, vedomstvolardyń birlesken jumysynyń nátıjesi kórindi. Menińshe bul sammıttiń mańyzdylyǵy EQYU sammıtinen asyp túspese de kemshin bolǵan emes»,- dedi D.Abaev.

Sonymen qatar ol Eýropalyq odaqqa múshe memleketterdiń ekonomıkalyq damý, saıası kózqaras turysynan birdeı saıasat ustanbaıtyndyǵyn basa aıtty.

«Al búkil ıslam álemin bir jerge toǵystyrý - bul Elbasynyń bedeliniń arqasynda oryn aldy, 83 eldiń delegatsııasynyń basy qosyldy. Onyń ishinde shamamen 15 memleket basshysy bar. Demek bul mańyzdy shara boldy», - dedi Dáýren Abaev.