Dáýren Abaev: Internette terrorızm nasıhattalǵan 13 myń materıalǵa shekteý qoıyldy
«Qazaqstanda destrýktıvti dinı aǵymdarmen kúrestiń aldyńǵy shebinde bilikti dintanýshylar men teologtar tur. Qazirgi tańda respýblıkada din boıynsha 7 myńnan astam maman jumys isteıdi. Salanyń negizgi baǵyty – ár adammen aqparattyq túsindirý jumystaryn júrgizý, destrýktıvti ıdeıalardy ustanatatyn azamattardy ońaltý jáne dinı ekstremızmge qarsy kontrnasıhat. Birinshi baǵyt boıynsha, bizdiń aqparattyq túsindirý toptary keshendi jumystardy júrgizip jatyr. Sońǵy 3 jylda 78 myńǵa tarta ártúrli shara ótkizilip, 15 mln adam qamtyldy. Alaıda aldaǵy ýaqytta bul jumysty budan da qyraǵy júrgizý kerek. Jalpy, aldyn alý sharalaryn qysqartyp, táýekel tobyndaǵylarmen jumysty kúsheıtken abzal», - dedi Dáýren Abaev Qazaqstan Dintanýshylarynyń HІ forýmynda.
Mınıstrdiń aıtýynsha, ol toptarǵa jumyssyzdar, ózin ózi jumyspen qamtıtyn azamattar, stýdentter men vahtada jumys isteıtin jumysshylar jatady.
«Ekinshi baǵyt boıynsha elde pozıtıvti dınamıka baıqalǵanyn atap ótý kerek. Destrýktıvti aǵymdy ustanatyn azamattardyń sany azaıyp barady. Bul rette biz «Aq nıet» ońaltý ortalyǵymen jáne óńirlik qurylymdarmen jumys júrgizýdemiz. Sonymen qatar, mass-medıada radıkaldy ıdeologııamen kúres kúsheıtildi. Zaıyrlylyq pen ultaralyq kelisim nasıhattalýda. kazislam.kz portaly jańartyldy. Quqyqqa qarsy sıpattaǵy materıaldardy anyqtaý maqsatynda ınternettik monıtorıng júrgiziledi. Jyl basynan beri. 2019 jyldyń basynan beri keńes berý tártibimen ınternet-alańda quqyqqa qarsy 25 myńǵa tarta materıal joıyldy. Terrorızm men dinı ekstremızm ıdeologııasy nasıhattalǵan 13 myń materıalǵa shekteý qoıyldy. Alaıda bul baǵyttaǵy jumysty áli de jetildirý kerek. Kontrnasıhat boıynsha áleýmettik jelidegi qolǵa alynǵan sharalar áli de álsizdeý. Jarııalanǵan materıaldyń formatyn qaıta qarap, sapaǵa mán berý kerek», - dedi ol.
Eske sala ketsek, elordada búgin Qazaqstan Dintanýshylarynyń HІ forýmy ótip jatyr.
