Dáýren Abaev Halyq bank pen Qazkom mámilesi týraly: mundaı dúnıelerdi jarııalaýǵa bolmaıdy

ASTANA. QazAqparat - QR Aqparat jáne kommýnıkatsııalar mınıstri Dáýren Abaev Halyq bank pen Qazkommertsbank arasyndaǵy bolýy yqtımal mámilege qatysty naqty nátıje bolmaıynsha, aqparat taratyp, jurtty dúrliktirýge bolmaıdy dep esepteıdi.

«Bankterdiń birigýi - qalypty protsess. El turǵyndary óz depozıtterin joǵaltyp alamyz dep qoryqpaýy kerek. Bálkim, halyq ótken tájirıbelerge qarap, ýaıymdap otyrǵan shyǵar. Mundaı ýaıym men kúdikke esh negiz joq. Eń negizgisin atap ótkim keledi: Qazkom da, Halyq bank te Qazaqstan azamattarynyń salymdaryn kepildendirý qorynyń qatysýshylary. Sol sebepti, eshqandaı suraqtar men alańdaýshylyqtar týyndamaýy tıis. Naqty nátıjege qol jetkizbeıinshe, mundaı dúnıelerdi jarııalaýǵa, jarnamalaýǵa bolmaıtynyn túsinýimiz qajet. Bul endi kommertsııalyq qupııa dep atalatyn bólek másele», - dedi mınıstr «Habar» telearnasyndaǵy «Otkrytyı dıalog» jobasy aıasynda.

«Halyq banki» AQ basqarma tóraıymy Úmit Shaıahmetovanyń aıtýynsha, eger mámile júzege assa, Halyq bank Qazkomdy satyp alyp, óziniń enshiles bankine aınaldyrady.

«Ázirge Qazkommen naqty kelisimshart jasalǵan joq. Mamyrdyń sońynda mámile aıaqtalady dep josparlanǵan edi, alaıda bul merzim keıinge shegerildi. Qazir Kazkomnyń jumys parametrleri tekserilip jatyr. Syrttan aýdıtor, konsýltant shaqyrdyq. Sondaı-aq, Ulttyq bankten keńes alyp jatyrmyz», - dedi Ú. Shaıahmetova.