Dáýren Abaev Feısbýk áleýmettik jelisinde jeke paraqsha ashty
«Qymbatty dostar! Feısbýktegi bul paraqshany men jumysyma baılanysty ashyp otyrmyn.
Búginde feısbýk-qoǵamdastyq qazaqstandyqtardyń azamattyq belsendiliginiń aınasyna aınaldy. Eń mańyzdy ári ózekti máseleler osy jerde talqylanady. Sondyqtan, men sizdermen udaıy baılanysta bolý arqyly ǵana qoǵamnyń tynys-tirshiliginen tolyq habardar bolatynyma senimdimin.
Bizdiń mınıstrlikke aqparat keńistigin, telekommýnıkatsııa naryǵy men memlekettik qyzmet kórsetý sektoryn damytý jóninde mańyzdy mindetter júkteldi.
Biz úshin árbir Qazaqstan azamatynyń júrgizilip jatqan reformalar men qabyldanatyn zańdardyń mánin túsingeni, eń ózekti máselelerge qatysty saýaldaryna memleketten sapaly jaýap alǵany mańyzdy», - dep jazdy Dáýren Abaev.
Sonymen qatar, mınıstr óz jazbasynda jumysty ashyqtyq pen eseptilik sııaqty eń basty qaǵıdattardy negizge ala otyryp júrgizetinin aıtty.
«Vedomstvomyz qazir uıymdastyrý máselelerin sheship jatyr. Taıaý arada josparlarymyzdy tanystyryp, ıdeıalar men usynystardy qarastyrýǵa daıyn bolamyz.
Yntymaqtastyǵymyz jemisti bolady dep senemin!» - dep jazdy QR Aqparat jáne kommýnıkatsııalar mınıstri.
