Dáýren Abaev: Erjan Maksımdi qoldaýda bizge birlik jetpeı qaldy

NUR-SULTAN. QazAqparat – Erjan Maksım – naǵyz ánshi degen atqa laıyq. Ol óneriniń qanshalyqty bıik ekenin dáleldep qoımaı, eńbeginiń eren ekenin dáleldep otyr.

QR Aqparat jáne qoǵamdyq damý mınıstri Dáýren Abaev jas ánshiniń Polshadaǵy jeńisi jaıly oıymen bólisti, dep habarlaıdy QazAqparat tilshisi.

«Ol ózin kópshilik arasynda ustaı biledi. Kásibı ári quziretti halyqaralyq tóreshiler biraýyzdan jeńisti Erjanǵa berdi. Baıqaýdyń qalǵan qatysýshylarynan Erjannyń bıik turǵany – eshqandaı kúmán týǵyzbaıdy. Sol sebepti, ol men úshin jeńimpaz», - dedi mınıstr «Ashyq dıalog» baǵdarlamasynda.

Dáýren Abaev Erjannyń jeńisin – qoǵam úshin tolaǵaı is tyndyryp jatqan «Habar» agenttiginiń búkil komandasynyń jeńisi dep baǵalady.

«Álbette, árbir memleket óz ulanyna daýys beredi. Daýys berýde shynaıylyq týraly sóz qozǵamaı-aq qoıýǵa bolady. Ony jaqsy túsinemiz. Osy sátti paıdalana otyryp, Erjanǵa daýys bergen azamattardyń barlyǵyna alǵysymdy aıtqym keledi. Ókinishke qaraı, bizdiń azamattardyń daýys berýdegi belsendiligi basqa elderge qaraǵanda báseńdeý boldy. Saıyp kelgende, Erjan emes – jeńilgen bizdiń kórermen. Jas daryndy qoldaýda bizge birlik jetpeı qaldy. Ahmet Baıtursynuly «Erim deıtin el bolmasa, elim deıtin er qaıdan shyǵady» degen. Sózdi osymen aıaqtaýǵa bolady», - dedi ol.

Eske sala ketsek, Polshada ótken «Junior Eurovision-2019» án baıqaýynda baq synaǵan qazaqstandyq Erjan Maksım ekinshi oryn alǵan bolatyn.

Prezıdenti Qasym-Jomart Toqaev Erjan Maksımdi án baıqaýyndaǵy júldesimen quttyqtady.