Dáýren Abaev: Elimizde 300-den astam mádenı nysanǵa suranys bar

NUR-SULTAN. QazAqparat – Qazaqstandyqtardyń mádenı suranysyn tolyqtaı qamtamasyz etý úshin taǵy 300-den astam nysan ashý qajet. Bul týraly QR Mádenıet jáne sport mınıstri Dáýren Abaev vedomstvonyń mádenıet, arhıv isi jáne baspa máselelerine arnalǵan keńeıtilgen alqa májilisinde málim etti, dep habarlaıdy QazAqparat tilshisi.

«Búginde elimizde 7637 mádenı nysan jumys istep tur. Taǵy da 300-den astam mekemege suranys bar. Ondaı qajettilik negizinen aýyldarda sezilip otyr», -dedi mınıstr.

Vedomstvo basshysy bul nysandardy salmas buryn jergilikti halyqtyń pikirine qulaq asý kerektigin eskertti.

«Deı turǵanmen, salada jumys isteıtin úkimettik emes uıymdar mundaı mekemelerdiń kópshiligi turǵyndardyń talap-tilegin eskermeı salynatynyn aıtady. Sonyń saldarynan salynǵan mekeme qańtarylyp, bos turady. Sol úshin josparlaǵan kezde turǵyndar pikirin eskerý mańyzdy.

Osy jıynǵa óńirlerdiń ókilderi qatysyp otyr. Sizderden osy máselege basa nazar aýdarýlaryńyzdy suraımyn. Mysaly, keıbir mektepterdiń janynda keremet kitaphanalar bar. Sony eskermesten, biz álgi eldi mekenge kitaphana salamyz. Onyń ornyna klýb salsa, áldeqaıda tıimdi bolar edi. Osyndaı máseleler óte kóp», - dedi Dáýren Abaev.