Dáýren Abaev elektrondy tsıfrlyq qoltańbadan bas tartýdy usyndy

ASTANA. QazAqparat - «Habar» arnasyndaǵy «Ashyq dıalog» jobasynyń efırinde QR Aqparat jáne kommýnıkatsııalar mınıstri Dáýren Abaev elektrondy tsıfrlyq qoltańbadan bas tartyp, birjolǵy qupııasózge kóshýdi usyndy. 

«Elektrondy tsıfrlyq qoltańbany biz 10 jyl buryn engizdik, ol kezde ETsQ sol ýaqyttyń talabyna saı boldy. Al qazir birjolǵy qupııasóz engizý tártibin usynyp otyrmyz. Kez kelgen adam birjolǵy qupııasóz arqyly kirip, tranzaktsııany oryndap, qaıta shyǵyp kete alady. Kelesi joly telefonyna jańa qupııasóz keledi. Júıe birshama jeńildeıdi», - dep atap ótti D. Abaev.

Sonymen qatar, mınıstr memlekettik qyzmetterdi alý boıynsha birjolǵy qupııasózdi paıdalaný tájirıbesi álemniń kóptegen elderinde qoldanylyp kele jatqandyǵyn atap ótti.

2019 jyly Qazaqstanda tsıfrlyq efırlik teleradıo habarlaryn taratý josparlanyp otyr. Ol úshin 827 radıotelevızııa stansalaryn salý qajet. Muny búkil el boıynsha bir ýaqytta júzege asyrý kerek. Búgingi tańda mundaı stansalardyń 700-den astamy ornatyldy. Bul jumysty eki jyl ishinde aıaqtaý josparlanyp otyr.

Sondaı-aq, mınıstrdiń aıtýynsha, Qazaqstanda saıası qýǵyn-súrgin qurbandaryna arnalǵan joba shyǵarylady. Jyl saıyn 31 mamyr kúni Qazaqstanda Saıası qýǵyn-súrgin qurbandaryn eske alý kúni atap ótiledi. Dáýren Abaev qazaqstandyqtar bul kúndi umytpaýy kerek dep atap ótti. Onyń aıtýynsha, buqaralyq aqparat quraldary bul taqyrypqa basa nazar aýdaryp, qazaq halqynyń tarıhyndaǵy qasiret jaıly aqparat keńinen nasıhattalýy kerek.

«Biz National Digital History-de  saıası qýǵyn-súrgin qurbandaryna arnalǵan úlken jobany shyǵarǵaly otyrmyz», - dedi Dáýren Abaev .