Dáýren Abaev Elbasynyń «Úlken Eýrazııa» jobasyn Altyn Ordanyń saıasatyna uqsatty

NUR-SULTAN. QazAqparat – Prezıdent ákimshiligi jetekshisiniń birinshi orynbasary Dáýren Abaev Altyn Orda murasyn talqylaǵan halyqaralyq konferentsııada Elbasynyń «Úlken Eýrazııa» jobasyna qatysty qyzyqty pikir aıtty, dep habarlaıdy QazAqparat tilshisi.

«Altyn Orda Shyǵys pen Batysty jalǵaıtyn kópir ispetti boldy. Uly Jibek jolynyń soltústik baǵytynda ornalasqan ımperııa órkenıetter arasyndaǵy jan-jaqty dıalogty – materıaldyq qundylyqtarmen qatar, ıdeıalar men ınnovatsııalardyń almasýyn qamtamasyz etti. Tarıhqa kóz salsaq, Altyn Ordanyń saıasatynan Elbasynyń BUU uıymy Bas assambleıasynyń minberinen tanystyrǵan «Úlken Eýrazııa» jobasynyń úlgisin kóre alamyz», - dedi ol «Ulyq Ulys-Altyn Orda: bastaýy, tarıhy jáne murasy» atty halyqaralyq ǵylymı-tájirıelik konferentsııada.

Dáýren Abaevtyń aıtýynsha, sol zamannyń ózinde Atyn Orda ıdeologııasynda adamı qundylyqtardyń orny erekshe bolǵan.

«Memlekettik basqarýdyń ortalyqtandyrylǵanyna qaramastan, Altyn Orda eshqashan klassıkalyq túrdegi «shyǵys despotııasy» bolǵan joq. Qoǵamnyń ózegin bılikke degen qorqynysh emes, halqymyz ımandylyq dep aıtatyn rýhanı túpnegiz qurady. Qazir de bizdiń qoǵamnyń taban tirer tuǵyry, yntymaqtastyqtyń negizi – «áleýmettik reıtıng» emes, ımandylyq pen máńgilik rýhanı qundylyqtar», - dedi Prezıdent ákimshiliginiń ókili.