Dáýren Abaev Elbasynyń Reseı men Ýkraına prezıdentterin kezdestirý bastamasyna pikir bildirdi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Elbasy Nursultan Nazarbaevtyń Reseı prezıdenti Vladımır Pýtın men Ýkraına prezıdenti Vladımır Zelenskııdi Qazaqstanda kezdestirý bastamasyna qatysty pikir bildirdi, dep habarlaıdy QazAqparat tilshisi.

«Kezdesýdiń uıymdastyrylatyny týraly naqty perspektıvalar týraly aıtýǵa áli erte. Bul jerde másele kúrdeli dıplomatııalyq qarym-qatynasqa baılanysty. Bizge baýyrlas eki eldiń, memlekettiń qaqtyǵysynyń keıingi jyldary agressıvti rıtorıkamen ýshyqqany sonshalyq, bir sátte ony sheshe salý múmkin emes. Alaıda bári de jaǵdaıdy ózgertý kerektigin uǵynyp otyr. Kelissóz júrgizýdiń Normandtyq nemese ózge de formattaryn kemshin demeımin. Bizdiń Elbasy jaǵdaıdyń beıbit sheshilýine qatysty óz kózqarasyn bildirdi», - dedi Dáýren Abaev «Ashyq dıalog» baǵdarlamasynda.

Mınıstr óz sózinde qazaqta «eldestirmek elshiden, jaýlastyrmaq jaýshydan» degen sózin eske saldy.

«Bul sózdiń mánin kópshilik túsiner degen oıdamyn. Kúni keshe halyqaralyq deńgeıdegi abyroıly basylymdardyń birqatary Nursultan Nazarbaevtyń sózin belsendi túrde jarııalady. Pýtın men Zelenskııdi kelissózder ústelinde kezdestirý bastamasy keshe ǵana eshkimniń oıyna kelmegenimen, búgingi kúni sarapshylar mundaı qadamnyń oń jáne teris jaqtaryn tarazylaı bastady. Al munyń ózi óte jaqsy belgi», - dedi ol.

Eske sala ketsek, 12 qarashada QR Tuńǵysh Prezıdenti – Elbasy Nursultan Nazarbaev Reseı men Ýkraına arasyndaǵy qaqtyǵysqa qatysty pikir bildirgen bolatyn.

Meniń oıymsha, Reseı men Ýkraınanyń prezıdentterin jeke kezdestirý kerek. Tek osylaı ǵana kelisýge bolady. Sebebi, eki el arasyndaǵy naqty jaǵdaı sheshiledi. Men osyndaı kezdesý múmkin dep oılaımyn», - dedi Elbasy.