Dáýren Abaev: Elbasynyń Eýropadaǵy kezdesýiniń bári el múddesine paıdaly bolǵanyna senimdimin
Mundaı pikirdi «Habar» arnasyndaǵy «Ashyq dıalog» baǵdarlamasynda qonaq bolǵan Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.
Dáýren Abaevtan júrgizýshi jaqynda ǵana Qazaqstan Prezıdenti Nursultan Nazarbaevtyń Eýropa elderine jasaǵan sapary týraly pikirin surady.
«Osy rette Elbasynyń Reseı men Ózbekstan eliniń basshylarymen Saryaǵashta ótken kezdesýin umyt qaldyrmaýymyz kerek. Kezdesý mártebesiniń beıresmıligine qaramastan, bul kelissózder eń aýqymdy máseleler boıynsha mańyzdy bolǵany anyq. Shynynda da, Memleket basshysy Eýropada álemdegi ekonomıkasy jetekshi eldiń basshylarymen kezdesti. Ol kezdesýlerdiń bári de bizdiń eldiń múddesin alǵa tartýda barynsha paıdaly bolǵanyna senimdimin», - dedi Dáýren Abaev.
Mınıstrdiń aıtýynsha, el ekonomıkasyna Qazaqstan Prezıdenti árdaıym basymdyq berip keledi.
«El ekonomıkasynyń ary qaraıǵy ósimi ınvestıtsııany qajet etedi. Mine, sondyqtan, Memleket basshysy Úkimetke tıisti tapsyrmalardy júktep qana qoımaı, óz úlgisimen kez kelgen ýaqytta áleýetti ınvestorǵa elimiz ben onyń múmkindikteri týraly aıtý kerektigin kórsetip otyr», - deıdi mınıstr.
Dáýren Abaev óz sózinde Elbasynyń Fınlıandııaǵa saparynyń arqasynda jalpy quny 500 mlrd AQSh dollary bolatyn 20-dan astam ártúrli qujattarǵa qol qoıylǵandyǵyn jetkizdi.
«Olardyń ishinde kólik, logıstıka men bank salasyndaǵy kelissózderdi atap ótýge bolady. Ekinshiden, Azııa jáne Eýropa forýmyna qatysýǵa baılanysty: bul sharanyń qazirgi ýaqytta mártebesi joǵary. Ol shara elýge tarta Eýropa men Azııa elderin biriktiredi. Sonymen birge, Qazaqstan ol sharaǵa qatysyp jatqan Ortalyq Azııadaǵy birden-bir memleket. Al joǵary deńgeıdegi kelissózder aldaǵy ýaqyttaǵy yntymaqtastyqty úılestirýge serpin beredi. Sonymen birge, sammıttiń qorytyndy qujatyna bizdiń qarjylyq ınstıtýttardyń aımaqtyq seriktestigi men dinaralyq dıalogty bekemdeý týraly bastamamyz endi. Meniń oıymsha, bul - óte jaqsy nátıje», - deıdi Dáýren Abaev.
Eske sala ketsek, qazannyń 17-i kúni Elbasy Fınlıandııa Prezıdenti Saýlı Nıınıstemen shaǵyn jáne keńeıtilgen quramda kezdesý ótkizgen bolatyn.
Kezdesýden keıingi birlesken málimdeme barysynda Nursultan Nazarbaev Qazaqstan-Fınlıandııa bıznesmenderi 600 mln dollardyń kelisimshartyn jasasqanyn, qazaq pen fınniń tarıhy da, taǵdyry da uqsas, elimizdiń kólik áleýeti zor ekendigin basa aıtty.
Sonymen birge, Memleket basshysy «Azııa-Eýropa» forýmynyń 12-shi sammıtine qatysqan edi.
