Dáýren Abaev: Elbasynyń el qamy úshin taǵdyrsheshti mindetterdi qoıýy - kóp nárseni ańǵartady

ASTANA. QazAqparat - Aqparat jáne qoǵamdyq damý mınıstri Dáýren Abaev «Nur Otan» partııasynyń XVIII sezinde kótergen áleýmettik bastamalary týraly pikir bildirdi, dep habarlaıdy QazAqparat tilshisi.

«Eń birinshiden, bul sez - partııanyń 20 jyldyq jumysyn qorytyndylaý dep aıtar edim. Osy jyldardyń ishinde «Nur Otan» evolıýtsııanyń barlyq kezeńderinen ótip, shaǵyn birlestikten - iri saıası kúshke aınaldy. Búgingi tańda partııa bizdiń eldiń búkil saıası júıesiniń sanaly ári eń bastysy júıe quraýshy elementi bolyp otyr. Memleket basshysy óz jaqtastarynyń aldyna el úshin taǵdyrsheshti mindetterdi qoıýy - kóp nárseni ańǵartady», - deıdi mınıstr «Habar» arnasyndaǵy «Ashyq dıalog» baǵdarlamasynda.

Dáýren Abaevtyń aıtýyna qaraǵanda, Prezıdent óziniń baǵdarlamalyq baıandamasy áleýmettik bastamalardyń aýqymy men sany jaǵynan teńdessiz bolyp otyr.

«Óz sózinde Memleket basshysy árbir qazaqstandyq júrgizilip jatqan reformalardyń nátıjesin búgin sezinýi kerek dedi. Meniń oıymsha, azamattarǵa ǵana emes, Úkimet pen ákimdikterge, partııalyq fılıaldarǵa joldanǵan úndeý sekildi. Bul rette sez - búkil atqarýshy jáne zańnamalyq júıelerdiń jumysynyń bastaýy bolmaq. Qoıylyp otyrǵan mindetterdiń aýqymy kópti tamsandyryp otyrǵanyna eshkim talasa qoımas. Mindettemeler kartasyna - kópbalaly otbasylardy qoldaý, bıýdjet qyzmetkerleriniń jaıy, qoljetimdi baspananyń qurylysy, jol, aýyz sý sekildi mańyzdy máseleler enip otyr», - deıdi Dáýren Abaev.

Aıta ketsek, keshe elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezi ótti. Jıynda Memleket basshysy halyqty qoldaýǵa arnalǵan birshama áleýmettik bastamalar týraly sóz qozǵaǵan bolatyn.