Dáýren Abaev E-gov portalynda suranysy joǵary memqyzmetterdi atady
"E-gov portaly ótkizgen saraptamaǵa saı el turǵyndary densaýlyq saqtaý qyzmetterin óte jıi paıdalanady eken. Sondyqtan da byltyr medıtsınalyq uıymǵa tirkelý men dáriger tańdaý sııaqty qyzmet elektrondy formatqa engizildi. 4 aıdyń ishinde bul qyzmetti 70 myń adam paıdalandy", - dedi mınıstr.
Onyń aıtýynsha, 2018 jyldyń jeltoqsan aıynan bastap narkologııalyq, psıhologııalyq jáne týbdıspanserler anyqtamasyn portal arqyly alýǵa múmkindik paıda boldy. Qazir qajetti qujattardy úıden shyqpaı-aq alýǵa múmkindik bar.
"Ózderińiz de bilesizder, bul anyqtamalar jumysqa ornalasatyn kezde, oqýǵa túserde jáne taǵy basqa sátterde qajet. Endigide jumys berýshi tarapqa kandıdattyń joǵaryda atalǵan dıspanserlerde tirkeýde turǵan-turmaǵany týraly aqparat bolsa jetkilikti. Sondyqtan da azamattar anyqtama alý úshin dıspanserlerdi aralap, kezekte turmaıdy", - dedi ol. Jalpy mınıstrdiń paıymynsha, memlekettik qyzmetterdi avtomattandyrý júıeli jumysty qajet etedi.
"Tájirıbe kórsetip otyrǵandaı, bul sharýa keshendi túrde, joǵary tsıfrlyq saýattylyqpen atqarylýy tıis. Sapaly ınternettiń engizilýin de ulǵaıta berýimiz kerek. Óıtkeni ótken jyldyń ózinde Halyqqa qyzmet kórsetý ortalyqtary arqyly 10 mıllıonnan astam mekenjaı anyqtamalary berilgen. Alaıda qazir bul qujatty elektrondy úkimet portaly arqyly, elektrondy tsıfrlyq qoltańbamen-aq nemese smartfondaǵy telegram-botty paıdalaný júıesimen de alýǵa bolady", - dedi Dáýren Abaev.
