Dáýren Abaev Dýbaıda The World Government Summit-ke qatysty
Sammıt búkil álemde bolashaq úkimetti qalyptastyrýǵa arnalǵan jahandyq tuǵyrnama bolyp tabylady.
130 úkimet jáne halyqaralyq uıym ókilderi Dýbaıda memlekettik mekemelerdiń jumysyn talqylaýda. Sammıt jyl saıyn adamzat aldynda turǵan ámbebap problemalardy sheshý úshin ınnovatsııalar men tehnologııalardy qalaı paıdalaný kerek ekenine basa nazar aýdara otyryp, úkimettiń kelesi tolqynyna ózekti mindetter qoıýda.
The World Government Summit-tiń ótkizilýi sheńberinde Dáýren AbaevDubai Media City qyzmetimen tanysty.
Dubai Media City 2000 jyly negizi qalanǵan. Medıaortalyq Dubai Holding quramyna kiredi jáne medıaındýstrııamen, ınternet-qoldaýmen, jańalyqtardy súıemeldeýmen, fılmder men rolıkterdi shyǵarýmen aınalysady. Sondaı-aq medıaortalyq baspa ónimderimen jáne baspamen aınalysady, túsirilim toptary úshin kóptegen pavılondary da bar. Medıaortalyq álemniń 24 memleketindegi 1300-den astam medıa kompanııalardyń qyzmetin úılestirýshi klaster bolyp tabylady.
Aqparat jáne kommýnıkatsııalar mınıstri BAQ jáne tele-, kınoındýstrııa salasyndaǵy osyndaı tájirıbe Qazaqstanǵa da medıa kompanııalardyń ózara is-qımyl jasaýy bóliginde paıdaly bolýy múmkin ekenin atap ótti.
Sonymen qatar, Mınıstr «WAM» aqparattyq agenttiginiń atqarýshy dırektory Mohamed Jálel Ál-Raısımen kezdesti.
Bul kezdesý barysynda «QazAqparat» halyqaralyq aqparattyq agenttiginiń bas dırektory Ásel Tólegenova men «WAM» aqparattyq agenttiginiń atqarýshy dırektory Ál-Raısı myrza yntymaqtastyq týraly memorandýmǵa qol qoıdy. Qujat kásibı birlestikter men halyqaralyq uıymdardaǵy múshelik sheńberinde elder arasynda tájirıbemen, jańalyq materıaldarmen, aqparattyq qyzmettermen almasýdy, yntymaqtastyqty jáne úılestirýdi boljaıdy. Qujat jýrnalısterdiń almasý boıynsha taǵylymdamadan ótkizýdi kózdeıdi.
«Biz Qazaqstan Respýblıkasymen burynnan beri tyǵyz qarym-qatynastamyz, bul kelisim eki el arasyndaǵy aqparat salasy bóligindegi ózara is-qımyldy kúsheıtedi, jańalyqtarmen almasýdy jeńildetedi, bir birimiz týraly tolyǵyraq aqparat beriledi dep úmittenemiz. Biz birlesken yntymaqtastyqta úlken múmkindikti jáne bolashaqty kóremiz. Sondaı-aq, biz osy baǵytta jumysty bastaı otyryp, ózimizdiń múmkindikterimizdi keńeıte alamyz dep oılaımyn», - dedi Mohamed Jálel Ál Raısı.
«Biz arab eline shaqyrǵandaryńyz úshin alǵysymyzdy bildiremiz. Bul eki el arasyndaǵy ózara is-qımyldy jalǵastyrýǵa kómektesedi. Biz BAÁ-men yntymaqtasýǵa qyzyǵýshylyq tanytyp otyrmyz. Eki eldiń kóshbasshylary eki memleket arasyndaǵy ózara is-qımyl jemisti bolýy úshin barlyǵyn jasaýda. Budan basqa, yntymaqtastyq sheńberinde 2017 jylǵy 10 maýsym - 10 qyrkúıek aralyǵynda Qazaqstannyń elordasynda ótetin aldaǵy EKSPO 2017 dúnıejúzilik kórmesin tolyq jarııalaýǵa nıettimiz. Tabysty yntymaqtasýǵa úmittenemiz», - dedi Aqparat jáne kommýnıkatsııalar mınıstri Dáýren Abaev.
«WAM» aqparattyq agenttigi 1976 jyly qurylǵan jáne búginde BAÁ-degi eń tanymal aqparattyq tuǵyrnama bolyp tabylady.
