Dáýren Abaev dárigerler men muǵalimderdi volonterlikke shetelde oqytýdy usyndy

NUR-SULTAN. QazAqparat – Aqparat jáne qoǵamdyq damý mınıstri Dáýren Abaev dárigerler men muǵalimderdi volonterlikke oqytý sharalaryn shetelde júrgizýdi usyndy, dep habarlaıdy QazAqparat tilshisi.

«Volenter jylyn ótkizemiz jáne onyń negizinde tıisti taldaý júrgizemiz. Osydan keıin naqty zańnamalyq bastamalardy jarııalaımyz. AQSh-ta eger de adam testileýden barynsha joǵary ball jınasa, bul óz kezeginde onyń oqýǵa túsýine kepildik bermeıdi. Osy oraıda mindetti túrde onyń qoǵamdyq qyzmetine, sporttyq jetistigine qaraıdy, ıaǵnı jalpy baǵalaý júrgiziledi. Biz de osyndaı baǵalaý turǵysynda tıisti qadam jasaýymyz múmkin», - dedi D. Abaev Májilistegi Úkimet saǵatynda.

Onyń sózine qaraǵanda, Volonter jyly aıasynda naqty jobalardy iske asyrý kózdelgen.

«Bizde bilim berý boıynsha naqty joba bolady. Biz joǵary oqý oryndary stýdentterine aýyldarǵa baryp, talantty jastardy tartýǵa ótinish jasaımyz. Bul turǵyda oqý túsý, UBT jáne basqa da sharalar qamtylady. Sondyqtan naqty qadamdarǵa ekpin qoıylady», - dedi mınıstr.

Munymen qosa, atalǵan baǵytta halyqaralyq yntymaqtastyqty nyǵaıtýǵa nazar aýdarylady.

«Bizdiń dárigerlerge, muǵalimderge tájirıbe jınaqtaý maqsatynda nege shetelge barmasqa? Osy oraıda dárigerlerge tıisti múmkindik jasalar edi», - dedi Dáýren Abaev.

Jalpy usynylǵan sharalar aıasynda densaýlyq baǵytynda qalada jumys istep júrgen bilikti dárigerlerdiń aýyldarǵa baryp, aqysyz járdem kórsetýi eskerilgen.

Esterińizge sala keteıik, QR Prezıdenti Qasym-Jomart Toqaevtyń Jarlyǵymen 2020 jyl Volonter jyly dep jarııalandy.