Dáýren Abaev birqatar BAQ-tyń EKSPO aýmaǵyna kóshýine qatysty pikir bildirdi
ASTANA. QazAqparat - QR Aqparat jáne kommýnıkatsııalar mınıstri Dáýren Abaev birqatar buqaralyq aqparat quraldary EKSPO aýmaǵyna kóshýi múmkin degen áńgimege qatysty pikirimen bólisti, dep habarlaıdy «QazAqparat» HAA tilshisi.
«Bul másele qazir qarastyrylyp jatyr. Biz naqty kimniń kóshetinin mindetti túrde jarııalaımyz. Bul bizge ǵana emes, EKSPO-ǵa (Ulttyq kompanııasy - red.) da baılanysty. Barlyq daıyndyq jumystary aıaqtalǵan soń, biz kóshetin bolamyz. (...) Munda tek memlekettik BAQ qana bolmaıdy», - dedi ol EXPO-2017 kórmesiniń týrıstik aýmaǵynyń ashylý saltanatynda.
Eske sala ketsek, «Astana EKSPO-2017» UK» AQ Basqarma tóraǵasy Ahmetjan Esimov Ortalyq kommýnıkatsııalar qyzmetinde ótken baspasóz máslıhatynda EKSPO-2017 halyqaralyq kórmesi jetekshi BAQ-tardyń ortalyǵy bolatynyn atap ótken bolatyn. Ol óz sózinde «kórmeniń bir bóligi yńǵaıly ınfraqurylym retinde ózin kórsete bilgenin» aıtqan edi.
