Dáýren Abaev beıbit jıyndarǵa qatysty álemdik tájirıbemen bólisti
«Biz halyqaralyq, onyń ishinde EQYU elderiniń tájirıbelerin tyńǵylyqty zerdelep shyqtyq. Tolyqtaı alǵanda, halyqaralyq tájirıbe álemniń kóptegen elderinde beıbit jıyndardy uıymdastyrý jáne ótkizý barysyndaǵy basty basymdyq qoǵamdyq qaýipsizdik ekendigin kórsetti. Qoǵamdyq-saıası ahýaldyń nasharlap ketýine baılanysty beıbit jıynalystar ótkizý jónindegi zańnamalaryn qatańdatýǵa barǵan birqatar demokratııalyq el bar», - dedi mınıstr Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrýlar engizý týraly» zań jobalaryn tanystyrý barysynda.
Onyń atap ótýinshe, zańdaryn yryqtandyrýǵa barǵan Frantsııa, Germanııa, Ulybrıtanııa, Polsha, postkeńestik keńistikte Qyrǵyzstan men Armenııa syndy elder de bar. Olarda beıbit jıyndardy ótkizý eskertý júıesi arqyly oryn alady.
«Ruqsat berý júıesi AQSh, Shvetsııa, Japonııa, Sıngapýrda qoldanylady. Beıbit jınalystardy uıymdastyrý men ótkizý máselelerin retteıtin qoldanystaǵy zańnamasy 25 jyl buryn, 1995 jyly qabyldanǵan. Qoǵam sanasyna jınalystar mádenıetin sińiretin ýaqyt keledi. Sóz qoldanystaǵy zańnamany tek ózgertý jaıynda ǵana emes, tujyrymdamalyq turǵyda jańa zań jobasy jaıynda bolyp otyr. Ol beıbit jıyndardyń barlyq túrlerin uıymdastyrý jáne ótkizý máselelerin reglamentteıtin bolady», - dedi Dáýren Abaev.
