Dáýren Abaev «Bazz Laıter» mýltfılmin prokatqa shyǵarmaýdyń sebebin túsindirdi

NUR-SULTAN. QazAqparat – Osy kúnderi «Bazz Laıter» mýltfılminiń Qazaqstanda kórsetilýine qatysty qyzý talqylaý júrip jatyr. Pikir ekige bólinedi, qarsylar men qoldaýshylar. QR Mádenıet jáne sport mınıstri Dáýren Abaev atalǵan týyndyny el aýmaǵynda prokatqa shyǵarmaýdyń sebebin túsindirdi, dep habarlaıdy QazAqparat tilshisi.

«Elimizde tsenzýraǵa tyıym salynǵan. Sondyqtan mınıstrlik «Bazz Laıter» anımatsııalyq fılmin Qazaqstanda kórsetýge tyıym salǵan joq. Meniń osyǵan deıingi jazbam tyıym salý týraly emes. Men mýltfılm prokatqa shyqpaıdy dedim. Odan ári BAQ jáne birqatar bloger óz betinshe túıindedi. Osy oraıda birneshe jaǵdaıdy eskergen jón. Aldymen elimizde atalǵan mýltfılmdi kórsetýge tek prodıýser Nurtas Adambaı ǵana qarsy shyqty degen birqatar medıalyq tulǵalardyń málimdemesi – manıpýlıatsııa. Jelide «Bazz Laıter» mýltfılmin kórsetýge tyıym salýdy talap etken petıtsııa jarııalandy. Petıtsııa 35 adamnyń qolyn jınap, 4 myńǵa jýyq adam oǵan qarsy shyqqan», - dep jazdy Dáýren Abaev Facebook paraqshasynda.

Mınıstrdiń aıtýynsha, atalǵan máselege qatysty birneshe óńirde mıtıng ótkizýge ótinish túsken.

«Mınıstrlik pen jergilikti atqarýshy organdardyń atyna azamattardan kóptegen ótinish tústi. Máseleni jaýapsyz qaldyrý, el azamattarynyń únine qulaq aspaý degen sóz. Ashyq Úkimet sol úshin de quryldy. Ekinshiden, azamattar ótinishiniń taldaý nátıjesi kórsetip otyrǵandaı olardy bir jynystylardyń bir-birin súıgeni ǵana tolǵandyryp otyrǵan joq. Olardy fılmdegi bir jynystylardyń otbasyn quryp, urpaq jalǵastyryp, ómirlik tártipke aınaldyrý faktisiniń oryn alýy alańdatyp otyr», - deıdi ol.

Sondaı-aq, vedomstvo basshysy mınıstrliktiń sıýjet etıkasyn baǵalaı almaıtyndyǵyn aıtyp, bastysy zańǵa qaıshy kelmeý kerektigin eskertti.

D. Abaev atalǵan jaıtqa qatysty qoǵam únin jaýapsyz qaldyra almaıtyndyǵyn da tilge tıek etti.

«Úshinshiden, joǵaryda aıtylǵan jaǵdaılarǵa taldaýdan soń mınıstrlik Qazaqstan aýmaǵynda kınokartına prokatymen aınalysýshylarmen birneshe ret keńes ótkizdi. Naqty usynymdar aıtyldy. Kórsetilimge tyıym bolǵan joq. Fılmder prokaty bul bıznes. Al bıznes kez kelgen sátte táýekeldiń bolý múmkindigin eskeredi. Joǵaryda atalǵan barlyq faktordy eskere kele fılmdi prokatqa shyǵarmaý týraly sheshim qabyldandy», - dep túıindedi mınıstr.

Eske salsaq, keshe Mádenıet jáne sport mınıstri Dáýren Abaev qyzý talqyǵa túsken «Bazz Laıter» anımatsııalyq fılmi Qazaqstan kınoteatrlarynda kórsetilmeıtinin málimdedi.

Osy oraıda QazAqparat tilshisi psıholog mamannan LGBT kontent balanyń ishki dúnıesi men qalyptasýyna jáne jynystyq tańdaýyna qanshalyqty áser etetindigin surap kórgen edi .