Dáýren Abaev barlyq aýdan ortalyqtaryndaǵy ınternettiń sapasyn tekserýdi tapsyrdy

ASTANA. QazAqparat - QR Aqparat jáne kommýnıkatsııalar mınıstri Dáýren Abaev elimizdegi barlyq aýdan ortalyqtaryndaǵy ınternettiń sapasyn tekserýdi júktedi, dep habarlaıdy «QazAqparat» HAA tilshisi.

«2017 jyldyń sońyndaǵy jaǵdaıy boıynsha 4G standartty joǵary jyldamdyqty ınternet jelisine 50 myń halyq turatyn barlyq eldi mekender, sondaı-aq, aýdan ortalyqtary qamtyldy. Osyǵan baılanysty Telekommýnıkatsııa komıtetine aýmaqtyq ınspektsııalarymen birge osy jyldyń alǵashqy toqsanynda atalǵan óńirlerdegi baılanystyń sapasyna taldaý jasaýdy tapsyramyn», - dedi mınıstr QR Aqparat jáne kommýnıkatsııalar mınıstrliginiń keńeıtilgen alqa májilisinde.

Dáýren Abaev keltirgen málimet boıynsha, qazaqstandyq telekommýnıkatsııanyń naryǵynda joǵary áleýet bar.

«Búkilálemdi ekonomıkalyq forýmnyń málimetine sáıkes, Qazaqstan ınternet qoldanýshylary jaǵynan 137 memlekettiń ishinde 5 pozıtsııaǵa kóterilip, 36 orynda shyqty. Internetti qoldanýshylardyń sany 2017 jyly halyqtyń 77 paıyzyna teń boldy. Bul kórsetkish 2016 jylmen salystyrǵanda 4 paıyzǵa joǵary», - deıdi Abaev.

Mınıstr sonymen qatar óz sózinde bıyl «QR-nyń aýyldy eldi mekenderinde talshyqty-optıkalyq baılanys jelileriniń qurylysy» jobasyn júzege asyra bastaıtynyn eske saldy.