Dáýren Abaev: BAQ-ta zorlyq-zombylyqqa ushyraǵan balalar týraly málimet jarııalaýǵa tyıym salǵymyz keledi

ASTANA. QazAqparat - BAQ-ta zorlyq-zombylyqqa ushyraǵan balalar týraly málimet jarııalaýǵa tyıym salǵymyz keledi. Búgin «Egemen Qazaqstan» gazetinde jarııalanǵan suhbatynda jańa zań jobasy jónindegi tilshi suraǵyna jaýap bergen Aqparat jáne kommýnıkatsııalar mınıstri Dáýren Abaev osylaı málim etti, dep habarlaıdy QazAqparat. 

Suhbat barysynda jýrnalıst mınıstrlik ázirlegen jańa zań jobasy týraly suraǵan bolatyn. «Sonymen, adamnyń jeke basyna qatysty málimetterdi jarııalaý úshin jýrnalıster jazbasha ruqsat alý kerek degen pikirden áli de aınymadyńyz ba?» dep suraıdy ol.

Dáýren Abaev bul rette zań jobasyna qatysty jumystyń júrip jatqanyna 9 aı bolǵanyn, osy ýaqyt ishinde qanshama talqylaýlar, pikirtalastar, jumys tobynyń otyrystary men qoǵamdyq tyńdaýlar ótkenin eske salady.

Mınıstrdiń aıtýynsha, qujatqa 200-den astam túzetý men tolyqtyrý engizilgen.

«Senseńiz, meniń qolymda zań jobasynyń 15 nusqasy boldy. Jobany 35 memlekettik organnyń kelisiminen ótkizdik. Esińizde bolsa, alǵashqy tujyrymdamasy ázirlengen bette biz ony ınternette jarııalap, jalpy talqylaýǵa shyǵardyq. Soǵan qaramastan, sizdiń sózińizge qarap, jýrnalısterdiń oıy áli ózgermegenin kórip otyrmyn», - deıdi mınıstr.

Onyń aıtýynsha, zań jobasynda jeke basqa qatysty málimetti jarııalaý úshin kelisimin alý qajettigi jónindegi talap kúshinde qaldy.

«Biraq, ol kelisimdi endi dıktofonǵa jazý arqyly da alýǵa bolady. Bul belgili bir deńgeıde BAQ ókilderiniń jumysyn kúrdelendirýi múmkin. Biraq adamnyń jeke ómirine aralasýǵa bolmaıtynyn eshkim áli joqqa shyǵarǵan joq. Bul - jalpyǵa birdeı adam quqyqtary jónindegi deklaratsııada bekitilgen qaǵıdat. Birqatar Eýropa elderinde, onyń ishinde Frantsııa, Grekııa, Vengrııa sııaqty elderde osyǵan uqsas erejeler bar. Sondyqtan, zańdy ázirleı otyryp, biz BAQ salasynyń damýyn ǵana emes, qarapaıym azamattardyń da múddesin este ustaýǵa tıispiz. Mysaly, biz bul zań arqyly BAQ-ta zorlyq-zombylyqqa ushyraǵan balalar týraly málimet jarııalaýǵa tyıym salǵymyz keledi. Qarap otyrsaq, bul da shekteý, alaıda bul qajettilikten týyndaǵan shekteý», - dep túsindiredi Dáýren Abaev.

Bul rette mınıstr aqparat quraldarynda reıtıng qýyp, nebir jantúrshigerlik derekterdi ońdy-soldy jarııalaý beleń alǵanyna nazar aýdarady.

«Jábir kórgen balanyń ómiri endi qalypqa túse bergende, ondaǵan jyldan keıin osy derekter aldynan shyǵa kelse qandaı tragedııa bolatynyn qazir BAQ ókilderi de, keıbir jaǵdaıda ata-analar da paıymdap jatqan joq. Sondyqtan, bir ǵana aqparat adamnyń búkil ómirin qurtyp, otbasyn oırandaýy múmkin ekenin esten shyǵarmaǵan abzal», - deıdi D. Abaev.
Zań jobasy aldaǵy ýaqytta Májiliske engizilmek.

«Negizgi talqylaý Parlament qabyrǵasynda bolady. ıAǵnı, qyzý pikirtalastar áli alda», - dedi ol.